លោក Florentino Perez ប្រធានក្លឹប Real Madrid បាននិយាយថាក្រុមការងាររបស់លោកព្យាយាមជាច្រើនលើកដើម្បីចុះកុងត្រាយក Pogba មករួមក្រុម ប៉ុន្តែលទ្ធផលនៅតែមិនអាចទៅរួច។
ការព្យាយាមតែមិនសម្រេចនេះ គឺត្រូវបានលោក Perez ដែលជាប្រធានក្លឹបបញ្ជាក់ថាវាកើតឡើងដូចករណីរបស់ខ្សែប្រយុទ្ធ Lewandowski ដែរ ដែលក្លឹបព្យាយាមទិញណាស់ តែចុងក្រោយនៅតែមិនអាច។ “មានកីឡាករដែលមិនត្រូវលក់ឡើយ។ យើងបានព្យាយាមទិញ Dowski ជាច្រើនឆ្នាំ ប៉ុន្តែមិនអាចកើតមានឡើងបានទេ ព្រោះរូបគេមិនមែនជាកីឡាករសម្រាប់លក់ចេញ។ ដូច Pogba អីចឹង Man Utd មិនលក់ឡើយ”។
ជាមួយគ្នានេះដែរ សេដ្ឋីអេស្ប៉ាញក៏បានបញ្ជាក់ទៀតដែរថាក្រុម Real Madrid រដូវកាលមុនធ្វើមិនបានល្អ ក៏ព្រោះតែក្រុមនេះជោគជ័យខ្លាំងពេក ជោគជ័យរហូតភ្លេចការបរាជ័យខ្លះ ដូច្នេះហើយទើបក្រុមទាំងមូលមើលទៅធ្វើមិនបានល្អឡើយ។ សម្រាប់រដូវកាលថ្មីនេះ លោករំពឹងថាគ្រប់យ៉ាងនឹងត្រលប់មករកភាពល្អប្រសើរវិញ៕ប្រភព៖ Marca