អតីតអ្នកចាត់ការក្លឹបកាំភ្លើងធំលោក Arsene Wenger ហាក់មានការប្រតិកម្មទៅលើទង្វើរបស់ Mohamed Salah នៅប្រកួតទល់ Burnley កាលពីថ្ងៃមុន រហូតបោះពាក្យថា Salah ចាំបាច់ត្រូវកែប្រែនូវអាកប្យកិរិយាមួយនោះ មុនអាចឈានដល់កម្រិតរបស់ Messi។
ការប៉ះទង្គិចផ្លូវចិត្តរវាងមិត្តរួមក្រុម Sadio Mane និង Mohamed Salah បានផ្ទុះខ្លាំងកាលពីប៉ុន្មានថ្ងៃមុន ដោយអំឡុងពេលអូសបាល់ដល់ប្រអប់គ្រោះថ្នាក់ Salah មិនព្រមកាត់បាល់ឲ្យទៅ Mane ទាំងដែលកីឡាករសេណេហ្គាល់ខំស្រែកហៅព្រោះខ្លួនមានចន្លោះទំនេរ ហើយកីឡាករអេហ្សីបបែរជាបង្ហើយដោយខ្លួនឯងជាមួយការរាំងស្ទះពីខ្សែការពាររបស់ Burnley រហូតខកខានឱកាសមួយនោះ។
ជុំវិញប្រតិកម្មរបស់លោក Wenger បានប្រាប់ beIN Sports ថា៖ “Salah គាត់មានភាពស្រដៀងទៅនឹង Messi ប៉ុន្តែគាត់ចាំបាច់ត្រូវស្វែងរកចំណុចសំខាន់មួយរបស់ Messi សិន ពិតណាស់ដែលខ្ញុំអាចថា Salah គាត់ល្អការបញ្ចប់ទី ប៉ុន្តែបើយើងមើលទៅ Messi គឺមានគ្រប់សព្វ ព្រោះគាត់លេងចេះចែកបាល់ឲ្យគ្នា ខុសពី Salah ដែលរាងអាត្មានិយមបន្តិច”។
លោកសង្កត់ធ្ងន់៖ “ចំណុចនេះអ្នកត្រូវសិក្សាឲ្យច្បាស់លាស់ ថាពេលណាដែលសក្តិសមនឹងការបញ្ចប់ទី ពេលណាសក្តិសមការចែកបាល់ឲ្យអ្នកដទៃ។ បែបណាមិញខ្ញុំនៅតែចូលចិត្ត Salah ទាំងដែលគាត់មានឥទ្ធិពលធំធេងណាស់”៕ ប្រភព៖ 90min