ជើងខ្លាំង ឡុង សុភី ដែលកំពុងត្រៀមខ្លួនយ៉ាងល្អក្នុងរយះពេលជាង ២ សប្ដាហ៍មកនេះដើម្បីប៉ះ រឿង សោភ័ណ្ឌ នៅវគ្គផ្ដាច់ព្រ័ត្រ ខ្សែក្រវាត់គោជល់ទម្ងន់ ៦៩គីឡូក្រាមដោយមានប្រាក់រង្វាន់ ៤០០០ដុល្លារអាមេរិក។ ការប្រកួតនឹងធ្វើឡើងនៅថ្ងៃទី ១៤ ខែ កញ្ញា ឆ្នាំ ២០១៩ ខាង ដែលផ្សាយផ្ទាល់តាមរយៈកញ្ចក់ទូរទស្សន៍ CNC។ សុភី បញ្ជាក់ថា៖« សម្រាប់ខ្ញុំសង្ឃឹមត្រឹម ៥០% ប៉ុណោះ ប៉ុន្តែរឿងជាក់ស្ដែង គឺឡើងលើសង្វៀនទើបដឹង។ យើងអាចមើលស្ថានការណ៍ និងចិត្តសាស្ត្រគូប្រកួត រឿង សោភ័ណ្ឌ សិន និងត្រូវបត់បែនតាមស្ថានការណ៍»។ យ៉ាងណាក្ដី ឡុង សុភី បានបង្ហើបរឿងសោកស្ដាយមួយកាលទៅប្រកួតសង្វៀន ONE: CHAMPIONS AND WORRORS នាឆ្នាំ ២០១៣ យ៉ាងដូច្នេះ៖«តាមពិតខ្ញុំគួរតែប្រកួតក្នុងកម្មវិធី Kickboxing ដែលស្រដៀងគុនខ្មែរដែរ ប៉ុន្តែ គេបិទកែង។ កាលនោះហ្វឹកហាត់ត្រៀមប្រកួត MMAបានតិចណាស់ ខ្ញុំស្ដាយក៏ស្ដាយ សើចក៏សើចពេលមើលវីដេអូឡើងវិញ។ ខ្ញុំផុសវីដេអូថ្មីៗនេះហើយមើលទៅអស់សំណើចខ្លះដែរ។ មើលទៅដូចអ្នកអត់ចេះវ៉ៃអីចឹង មិនដឹងប្រើជំហរ អ្វី MMA បន្តិច និង គុនខ្មែរបន្តិច»។
កូនសិស្សរបស់លោក ឡុង សាលវ័ន្ត បានរៀបរាប់ទៀតថា គ្រានោះរូបគេហ្វឹកហាត់ក្បាច់ឃ្លេ ក្បាច់កាច់ និង ចំបាប់បានត្រឹម ២ សប្ដាហ៍ប៉ុណ្ណោះមុនចេញទៅប្រកួតតំណាងឲ្យកម្ពុជាកាលពី ៦ ឆ្នាំមុននៅក្រុងក្រុង ហ្សាកាតា ប្រទេសឥណ្ឌូណេស៊ី។ បើក្រឡេកមើលវីដេអូឡើងវិញ នៅទឹកទី១ ឡុង សុភីត្រូវបានកីឡាករគុនចម្រុះឥណ្ឌូណេស៊ី Max Metino រត់ចូលបោកតែម្ដងដោយសារគេមានក្បាច់បាតគុនចម្រុះស្រាប់ ខណៈដែល សុភី ជំនាញគុនខ្មែរ។ Max Metino បានចូលកៀក ដើម្បី បោក និង ចាប់ឃ្លេ ចំនួន ២ ដង ប៉ុន្តែ សុភី រើរួចឃ្លេមួយគ្រា។ យ៉ាងណាក្ដីដោយសារការហ្វឹកហាត់បានតិចតួចខាងគុន MMA សុភី មិនអាចគេចផុតពីឃ្លេម្ដងទៀតឡើយរហូតដល់ចប់ទឹកទី១។ សុភី បានព្យាយាមគ្រប់មធ្យោបាយដើម្បីកុំឲ្យ Max ចូលកៀក ប៉ុន្តែការរារាំងត្រូវបរាជ័យ ហើយ កីឡាករឥណ្ឌូណេស៊ី ចូលបោកបានដោយប្រើកំភួនដៃអុក សុភី ពីលើហូរហែ រហូត ហើយ ដៃ និង ជើងម្ខាងរបស់គេគាបឃ្លេទាល់តែ អាជ្ញាកណ្ដាលបញ្ឈប់ត្រឹមចុងទឹកទី២។
វីដេអូ៖ ឡុង សុភី ចាញ់ Max
https://www.youtube.com/watch?v=C95PmhGCEvw&feature=youtu.be
ទោះជាបែបណាក្ដី ប្អូនប្រុសបង្កើតរបស់គ្រូបង្វឹក ឡុង សាលវ័ន្ត រូបនេះបង្ហាញក្ដីសង្ឃឹមថា ៖« បើគេផ្ដល់ឱកាសដល់ខ្ញុំម្ដងទៀត ខ្ញុំខំហ្វឹកហាត់ឲ្យខ្លាំង រួមទាំងការត្រៀមឡើងរេញរហូតមកនេះអាចល្អប្រសើរក្នុងកម្មវិធីប្រកួត Kickboxing វិញ ដែលវាខុសគ្នាបន្តិចអំពីប្រដាល់សេរី ឬ គុនខ្មែរប៉ុណ្ណោះ។ ការប្រកួតគុនខ្មែរជាជំនាញរបស់យើង។ បើឲ្យប្រកួតគុនចម្រុះ គឺ ដឹងតែចាញ់ប្រៀបគេហើយ។ ប៉ុន្តែដោយសារពីមុនគេអត់ទាន់ដាក់កម្មវិធី Kickboxing»។
គួរដឹងដែរថា ឡុង សុភី មានអាយុ ៣១ ឆ្នាំហើយនាពេលបច្ចុប្បន្ន ប៉ុន្តែនៅតែហ្វឹកហាត់ទៀងទាត់ និងឡើងសង្វៀនប្រកួតនានាមិនដាច់សូរ។ សុភី មានស្រុកកំណើតនៅភូមិ ស្វាយកង់ ឃុំអន្លង់វិល ស្រុកសង្កែ ខេត្តបាត់ដំបង។ ឡុង សុភី ឡើងប្រកួតមិនក្រោម៦០០ ដង ឡើយ បើគិតការប្រកួតតាមតំបន់ តាមសង្វៀនទូរទស្សន៍ និង កម្មវិធីអន្តរជាតិនានា។ កីឡាករជំនាញកែង និង ជង្គង់ ឈ្នះខ្សែក្រវាត់ស្រាសាច់ដុំ, Gold Region, ឈ្នះប្រាក់រង្វាន់ពីធនាគារ, ឈ្នះនិង ខ្សែក្រវាត់ K-Cement ជាដើម។