ក្លឹប Arsenal ត្រូវបានគេរាយការណ៍ថាធ្លាប់ចាប់អារម្មណ៍ចង់ទិញយកខ្សែប្រយុទ្ធ Vinicius Junior របស់ក្លឹប Real Madrid ប៉ុន្តែពុំទទួលជោគជ័យលើការចរចា ពោលគឺស្តេចសបានបដិសេធច្រានចោលទាំងមិនស្ទាក់ស្ទើរ។
តាមសារព័ត៌មាន UOL បានឲ្យដឹងថាអ្នកចាត់ការផ្នែកបច្ចេកទេសទើបឡើងកាន់តំណែងថ្មីរបស់កាំភ្លើងធំគឺលោក Edu បាននិយាយចរចាជាមួយខាងភាគី Los Blancos ដើម្បីបញ្ចុះបញ្ចូលក្នុងការនាំយកយុវជនសញ្ជាតិប្រេស៊ីលរូបនេះនៅទីផ្សារដោះដូររដូវក្តៅ។
ផ្ទុយទៅវិញអ្នកចាត់ការលោក Zinedine Zidane បានបដិសេធយ៉ាងដាច់អហង្ការ ដោយមិនព្រមប្រគល់ចេញកីឡាករវ័យ ១៩ ឆ្នាំរូបនេះដាច់ខាត ព្រោះព្យាករណ៍ថាអាចមានតម្លៃខ្ពស់ទៅថ្ងៃអនាគត។
បញ្ជាក់ថា Vinicius កាលពីរដូវកាលចាស់ បង្ហាញខ្លួនបាន ៣៦ ប្រកួត រកបាន ១៣ គ្រាប់ក្រោយចាកចេញពី Flamengo៕ ប្រភព៖ Sportsmole