គ្រូ​ជម្រើស​ជាតិ​ថៃ៖ ​ក្រុម​ខ្វះ​ខ្សែ​ប្រយុទ្ធ ព្រោះ​លីគ​ថៃ​យក​ខ្សែ​ប្រយុទ្ធ​បរទេស​ច្រើន​ពេក​

លោក Nishino ​គ្រូ​បង្វឹក​ក្រុម​ជម្រើស​ជាតិ​ថៃ ​ថា​ក្រុម​របស់​លោក​មិន​មាន​ខ្សែ​ប្រយុទ្ធ​ច្រើន ព្រោះ​លីគ​ថៃ​បាន​នាំ​យក​ខ្សែ​ប្រយុទ្ធ​បរទេស​មក​លេង​លីគ​ច្រើន​ពេក ដែល​ធ្វើ​ឱ្យ​កីឡាករ​ក្នុង​ស្រុក​បាត់​បង់​ឱកាស។

ក្រុម​ជម្រើស​ជាតិ​ថៃ ​នឹង​ត្រូវ​ប៉ះ​ក្រុម​ជម្រើស​ជាតិ​វៀតណាម ​នៅ​ល្ងាច​នេះ ​ក្នុង​ការ​ប្រកួត​ជម្រុះ World Cup 2022 ​ពូល​G ។ សម្រាប់​ការ​ប្រកួត​នេះ​ដែរ ​ក្រុម​ជម្រើស​ជាតិ​ថៃ ​បាន​កោះ​ហៅ​កីឡាករ​២៣​នាក់ តែ​ក្នុង​នោះ​ភាគ​ច្រើន​សុទ្ធ​តែ​បម្រើ ​មិន​មាន​ប្រយុទ្ធ​ពេញ​តួ​នោះ​ទេ។ ការ​ជ្រើសរើស​ដូច្នេះ ត្រូវ​បាន​លោក Nishino ​ពន្យល់​ថា​លីគ​ថៃ ​ក្រុម​នីមួយ​ៗ​បាន​ប្រើ​ប្រាស់​កីឡាករ​បរទេស​នៅ​តំបន់​ប្រយុទ្ធ​ច្រើន​ពេក ដែល​រឿង​នេះ​ធ្វើ​ឱ្យ​ខ្សែ​ប្រយុទ្ធ​ក្នុង​ស្រុក​បាត់​បង់​ឱកាស​លេង​ច្រើន។

តែ​ទោះ​ជា​យ៉ាង​នេះ​ក្ដី គ្រូ​បង្វឹក​ដែល​នាំ​ក្រុម​ជប៉ុន​ឡើង​ដល់​វគ្គ​១៦​ក្រុម​ចុង​ក្រោយ World Cup 2018 ​កន្លង​ទៅ ​នៅ​តែ​មាន​ជំនឿ​ថា​ក្រុម​ថៃ​នឹង​ទទួល​បាន​លទ្ធផល​ល្អ​ដដែល​សម្រាប់​ការ​ប្រកួត​នេះ។ ​លោក Nishino ​បញ្ជាក់​ថា​កីឡាករ​ទាំង​២៣​នាក់​របស់​លោក ​គឺ​សុទ្ធ​តែ​អាច​រក​គ្រាប់​បាល់​បាន ដូច្នេះ​នឹង​មិន​មែន​ជា​បញ្ហា​ឡើយ​សម្រាប់​ការ​ប៉ះ​វៀតណាម​នៅ​ល្ងាច​នេះ៕ប្រភព៖ Bangkokpost

ភ្ជាប់ទំនាក់ទំនងជាមួយ CTS SPORT