ក្រុមកីឡាករគុនល្បុក្កតោកម្ពុជា បានឈ្នះមេដាយ៧គ្រឿង មានមាស៦ សំរឹទ្ធិ១ លើប្រភេទទម្ងន់ផ្សេងគ្នា ក្នុងការប្រកួត Pre-SEA Games លើវិញ្ញាសា Arnis នៅសាធារណរដ្ឋកូរ៉េ។ជ័យជម្នះដ៏ធំធេងនេះ ធ្វើឲ្យកម្ពុជាមានរំពឹងខ្ពស់សម្រាប់ការចូលរួមប្រកួតកីឡាស៊ីហ្គេមលើកទី៣០នៅប្រទេសហ្វីលីពីនឆ្នាំនេះ។
វិញ្ញាសាដំបងខ្លី Arnis នេះ ជាក្បាច់គុនវប្បធម៌ ប្រពៃណីរបស់ហ្វីលីពីនដែលខុសពីវិញ្ញាសាដំបងខ្លីក្នុងគុនល្បុក្កតោ ដោយសារតម្រូវឲ្យកីឡាករពាក់ខោអាវ និងមួកការពារដងខ្លួននិងក្បាល ដើម្បីការពារកុំឲ្យមានរបួស ឬគ្រោះថ្នាក់ផ្សេងៗពីការវាយរបស់កីឡាករ ដែលមានដំបងខ្លីរៀងៗខ្លួន។
ក្រោយឆ្លងកាត់ការប្រកួតយ៉ាងស្វិតស្វាញ ក្រុមកីឡាករល្បុក្កតោកម្ពុជាដណ្តើមបានមេដាយមាស៦ ដែលជួយកម្ពុជាមានភាពលេចធ្លោខ្លាំងក្នុងការប្រកួតនេះ។ មេដាយមាសទាំង៦រកបានម្នាក់មួយដោយកីឡាការិនី ខៀវ ចិន្តារ័ត្ន, យស់ សញ្ចនា, ពេជ្រ ពន្លឺ, សុខ ប៊ុនយ៉ុង, មឿន ប៊ុនលី និង ឈឹម សីលា និងម្សិលមិញ ឈ្នះមេដាយសំរឹទ្ធិ១គ្រឿងទៀតផងដែរ។
ការប្រកួតនេះមានកីឡាករកីឡាការិនីមកពី៤ប្រទេសចូលរួមរួមមានកម្ពុជា ហ្វីលីពីន វៀតណាម និងមីយ៉ាន់ម៉ា។ ការប្រកួតធ្វើឡើងនៅប្រទេសកូរ៉េ ដែលរៀបចំដោយគណៈកម្មការរៀបចំការប្រកួតកីឡា Arnis របស់ហ្វីលីពីន។ ក្រុមកីឡាករល្បុក្កតោនឹងត្រឡប់មកមាតុប្រទេសវិញនៅថ្ងៃទី៧ ខែកញ្ញា ឆ្នាំ២០១៩៕
https://www.facebook.com/KunBokatorFederation/videos/422685598362939/