ទីផ្សារដោះដូរកីឡាករតំបន់អឺរ៉ុបបិទត្រឹមយប់មិញនេះហើយ ដោយក្នុងនោះក្រុម Real Madrid បាននាំយកអ្នកចាំទីថ្មី Areola ពីក្រុម PSG មករួមក្រុម។
Areola មករួមក្រុម Real Madrid នេះ គឺជាចំណែកមួយនៃការទិញដូរ Navas របស់ PSG ។ ក្នុងកុងត្រាទិញ Navas គឺ Areola នឹងត្រូវមករួមក្រុម Real Madrid ក្រោមលក្ខខណ្ឌខ្ចីជើង១រដូវកាល។ និយាយពីអ្នកចាំទីថ្មីដែលទើបមកអេស្ប៉ាញនេះ គឺអាចនិយាយបានថាល្អសម្រាប់ដៃទី២របស់ Real Madrid ហើយ ព្រោះរូបគេធ្លាប់ជួយបារាំងលើកពាន World Cup U20 ម្ដង និងឈុតធំឈ្នះ World Cup 2018 ថែមទៀត។
កីឡាករវ័យ២៦ឆ្នាំនេះ មានឪពុកម្ដាយជាជនជាតិហ្វីលីពីន ហើយកើតនៅបារាំង។ ដូច្នេះហើយទើបរូបគេអាចលេងឱ្យជម្រើសជាតិបារាំងបាន។ រូបគេត្រូវរង់ចាំរហូតដល់ថ្ងៃ១០ខាងមុខនេះ ទើបចូលរួមហ្វឹកហាត់ជាមួយក្រុម Real Madrid បាន ដោយត្រូវបំពេញលិខិតស្នាមនានាសិន៕ប្រភព៖ Marca