ក្រុម Arsenal លេងបានត្រឹមស្មើក្រុម Spurs ក្នុងលទ្ធផល ២-២ ក្នុងការប្រកួតសប្ដាហ៍ទី៤លីគកំពូលអង់គ្លេសកាលពីយប់មិញនេះ។
ក្នុងការប្រកួតដ៏ជក់ចិត្តនេះដែរ ក្រុមភ្ញៀវ Spurs ជាអ្នករកគ្រាប់បាល់នាំមុខបាន២គ្រាប់មុន ប៉ុន្តែត្រូវក្រុមម្ចាស់ផ្ទះ Arsenal ព្យាយាមវាយសម្រុករហូតតាមបានស្មើវិញ។ ចប់៩០នាទី ក្រុមទាំងពីរនេះបានត្រឹមចែកគ្នាម្នាក់១ពិន្ទុប៉ុណ្ណោះ ពីការប្រកួតសប្ដាហ៍នេះ។
និយាយពីស្ថានភាពប្រកួតនេះវិញ ពិតជាស្វិតស្វាញខ្លាំង ព្រោះជាជំនួប London Derby ។ យ៉ាងណាមិញ បើតាម Kane ប្រធានក្រុមរបស់ Spurs បានអះអាងថារូបគេគួរតែបានបាល់ប៉េណាល់ទី១គ្រាប់នៅចុងម៉ោង គ្រាដែលកីឡាករ Sokratis បានរុញគេពីក្រោយក្នុងប្រអប់គ្រោះថ្នាក់។ តែគួរឱ្យសោកស្ដាយ អាជ្ញាកណ្ដាលមិនផ្ដល់ឱ្យឡើយ ហើយក៏មិនចាប់កំហុស និងពិនិត្យ VAR នោះដែរ។
ឆ្លងកាត់៤ប្រកួតមកនេះ ក្រុម Spurs ហាក់ចាប់ផ្ដើមមិនល្អឡើយ ដោយឈ្នះបានតែ១ប្រកួតប៉ុណ្ណោះ ស្មើ២ប្រកួត និងចាញ់១ប្រកួត។ ដោយឡែកក្រុម Arsenal វិញ ៤ប្រកួតពួកគេគឺឈ្នះ២ប្រកួត ចាញ់១ប្រកួត និងស្មើ១ប្រកួត៕ប្រភព៖ Dailymail