លោក Solskjaer អ្នកចាត់ការក្រុម Manchester United បានបញ្ជាក់ថាខ្សែប្រយុទ្ធ Sanchez ទៅចូលរួមជាមួយ Inter Milan មែន ប៉ុន្តែរូបគេនៅតែជាកីឡាកររបស់បិសាចក្រហមដដែលទេ។
Sanchez ផ្លាស់ទៅលេងនៅ Inter Milan នេះ ក្រោមលក្ខខណ្ឌខ្ចីជើង១រដូវកាល។ ការឱ្យក្លឹបអ៊ីតាលីខ្ចីជើង គឺជាវិធីសាស្ត្ររបស់ក្រុមបិសាចក្រហមដែលកាត់បន្ថួយការចំណាយខ្លះទៅលើតម្លៃពលកម្មកីឡាករ។ បើតាមលោក Solskjaer អ្នកចាត់ការក្រុម Man Utd បានបញ្ជាក់ថាលោកនឹងនាំកីឡាករឈីលីនេះ មកវិញ ប្រសិនបើរូបគេបង្ហាញទម្រង់លេងនារដូវកាលនេះក្នុងលីគអ៊ីតាលី។
អ្នកចាត់ការខាងលើបានប្រាប់ទៅ SkySport ដូច្នេះថា៖ “វាគ្រាន់តែជាការខ្ចីជើង១ឆ្នាំប៉ុណ្ណោះ។ យើងសង្ឃឹមថាពួកគេមានអាជីពច្បាស់លាស់ ហើយទៅទីនោះគឺដើម្បីលេងនិងបង្ហាញថាខ្លួនក៏នៅតែជាកីឡាករ Man Utd ដែរ។ យើងចង់ឱ្យគេធ្វើឱ្យបានល្អបំផុត”។ Sanchez តាំងពីផ្លាស់មកលេងនៅ Man Utd មកបង្ហាញខ្លួន៤៥ប្រកួត រកបានតែ៥គ្រាប់ប៉ុណ្ណោះ ហើយរូបគេជាកីឡាករមានតម្លៃពលកម្មខ្ពស់ជាងគេក្នុងក្លឹបផងដែរ៕ប្រភព៖ dailymail