ការប្រកួតបាល់ទាត់លីគលំដាប់ទី៣របស់ប្រេស៊ីល ត្រូវផ្អាកមួយសន្ទុះ ក្រោយពីផ្សែងច្រើនពេក ដោយសារតែការឆេះព្រៃនៅអាម៉ាហ្សូន។
ការប្រកួតរវាងក្រុម Atletico Acreano និង Luverdense ដែលធ្វើឡើងនៅកីឡដ្ឋាន Rio Branco ត្រូវកាត់ចង្វាន់ ដោយសារតែផ្សែងច្រើនពេក កីឡាករមិនអាចដកដង្ហើមបានស្រួល។ កីឡាករតម្រូវឱ្យចាកចេញពីទីលានដើម្បីរកកន្លែងមានខ្យល់បរិសុទ្ធ ព្រោះថាក្នុងកីឡដ្ឋានពោរពេញដោយផ្សែងសឹងតែមើលគ្នាលែងស្គាល់។ ការប្រកួតនេះត្រូវផ្អាកច្រើននាទី ទម្រាំតែផ្សែងបានហើរអស់ ទើបអាជ្ញាកណ្ដាលដំណើរការប្រកួតវិញ ព្រោះខ្លាចប៉ះពាល់សុខភាពកីឡាករ។
រំលឹកថាព្រៃអាម៉ាហ្សូនឆេះនេះអស់ពេល៣សប្ដាហ៍មកហើយ បច្ចុប្បន្នមានប្រទេសជាច្រើនជួយពន្លត់ភ្លើងនេះ ហើយប្រេស៊ីលផ្ទាល់ក៏បានបញ្ចេញកងកម្លាំងដើម្បីចុះពន្លត់ផងដែរ។ ទំហំដែលបានឆេះអស់រាប់ម៉ឺនហិកតាទៅហើយ ខណៈដែលសត្វព្រៃជាច្រើនក៏បានស្លាប់ក្នុងហេតុការណ៍នេះផងដែរ៕ប្រភព៖ Dailymail
