ក្រុមសេះបង្កង់ Juventus កំពុងចង់ប្ដូរម៉ោងប្រកួតទៅលេងក្បាលព្រលប់វិញ ដើម្បីឱ្យអ្នកគាំទ្រនៅតំបន់អាស៊ីងាយស្រួលទស្សនា។
ការប្រកួតលីគកំពូលអ៊ីតាលី ភាគច្រើនប្រកួតនៅពាក់កណ្ដាលយប់។ នេះបានធ្វើឱ្យទីផ្សាររបស់ក្រុម Juventus ធ្លាក់ចុះនៅតំបន់អាស៊ី បើទោះជាបច្ចុប្បន្ននេះពួកគេមានប្រជាប្រិយភាពខ្លាំង បើសរុបជារួមក៏ដោយ។ ថ្នាក់ដឹកនាំក្រុមនេះ បានជួបអ្នករៀបចំការប្រកួត Serie A ដើម្បីរកដំណោះស្រាយណាមួយ រៀបចំការប្រកួតឱ្យលេងនៅក្បាលព្រលប់វិញ ដើម្បីទាក់ទាញអ្នកគាំទ្រនៅអាស៊ីបាន។
មិនថានៅលីគអ៊ីតាលីឡើយ សូម្បីនៅអេស្ប៉ាញ La Liga និងអង់គ្លេស Premier League បច្ចុប្បន្ននេះក៏បានរៀបចំការប្រកួតខ្លះលេងនៅម៉ោងក្បាលព្រលប់ដែរ ដើម្បីទាញយកអ្នកគាំទ្រ។ នៅអាស៊ី ទីផ្សារលេខ១បានទៅលើលីគអង់គ្លេស ដោយឈ្នះក្របខណ្ឌផ្សេងៗទៀតដាច់តែម្ដង៕ប្រភព៖ Bbc
