ក្រុម PSG បានដាក់ការចាប់អារម្មណ៍លើកីឡាករ Real Madrid ២នាក់គឺ Vinicius និង Modric មករួមក្រុមមុនទីផ្សារដោះដូរកីឡាករបិទនៅថ្ងៃទី២ ខែក្រោយនេះ។
ក្រុម PSG កំពុងព្យាយាមបញ្ចេញកីឡាករ Neymar របស់ខ្លួន ដោយមានក្លឹប២ចង់បានគឺ Barcelona និង Real Madrid ។ ក្រុម Barcelona កំពុងចែចូវខ្លាំងជាងគេ ដោយប្រើគ្រប់វិធី មានទាំងថែមកីឡាករឱ្យទៅ PSG ទៀតដើម្បីយក Neymar ។ ស្របពេលសាមីខ្លួនគេក៏ចង់ទៅទ្រនំចាស់នេះវិញដែរ។ តែសម្រាប់ PSG វិញ ហាក់មិនចង់បានកីឡាករក្រុមអ្នកមានបុណ្យណាម្នាក់ទេ ពួកគេចង់បានលុយសុទ្ធតែម្ដងចំពោះតម្លៃខ្លួន Neymar នេះ។
យ៉ាងណាមិញបើតាមលោក Leonardo ថ្នាក់ដឹកនាំរបស់ PSG នៅថ្ងៃនេះបែរជាបង្ហើបថាក្រុមការងាររបស់លោកមើលឃើញនិងចង់បានកីឡាករ២នាក់របស់ Real Madrid ប្រសិនបើក្រុមមួយនេះចង់បាន Neymar ទៅលេងនៅក្រុមម៉ាឌ្រីត។ កីឡាករ២នាក់ដែលក្រុមបារាំងចង់បានគឺ Vinicius និង Modric ។ ប្រសិនបើ Real Madrid ព្រមឱ្យកីឡាករ២នាក់នេះ និងផ្ដល់ប្រាក់ជាង១០០លានផោនទៀត នោះពួកគេនឹងបាន Neymar មិនខាន៕ប្រភព៖ MACA
