• Messi ឡាវ រកក្លិបថ្មីបានហើយ ត្រៀមខ្លួនចូលជម្រើសជាតិវិញ ក្រោយបាត់មុខជាង១ឆ្នាំ

    នាព្រឹកថ្ងៃទី ២១ ខែ មិថុនា ឆ្នាំ ២០១៨ នេះ ព័ត៌មានមួយទាក់ទងនឹងអតីតកីឡាករជម្រើសជាតិឡាវ Soukaphone Vongchiengkham ដែលត្រូវបានអ្នកគាំទ្រឡាវស្គាល់ថាជា Messi ឡាវ នោះ ត្រូវបានក្លិប Sisaket FC ស្ថិតនៅលីគទីពីរថៃ ព្រមព្រៀងយកទៅចូលរួមហើយ។

    បើតាមការឲ្យដឹងពីគេហទំព័ររបស់ក្លិប Messi ឡាវ នឹងត្រូវជួយក្លិប Sisaket FC ក្នុងជើងទីពីរនៃការប្រកួតលីគទីពីរថៃ រហូតដល់ចប់រដូវកាល ។

    គួរបញ្ជាក់ថា Soukaphone Vongchiengkham មិនមានក្លិបចាប់តាំងពីចប់ឆ្នាំ ២០១៦ មក គ្រាដែលក្លិបរបស់ខ្លួន Lanexang United ប្រកាសក្ស័យធន និងបិទទ្វារ ។ តែក្រោយមកក៏បានដឹងថារូបគេចូលរួមជាមួយនឹងក្លិបចំណូលថ្មីរបស់លីគកំពូលឡាវ គឺ Vientiane United បាន ១រដូវកាលផងដែរ ។

    នេះគឺជាវត្តមានថ្មីមួយសម្រាប់រូបគេ ដែលទទួលស្គាល់ថាជាកីឡាករល្អមួយរូបក្នុងក្រុមជម្រើសជាតិ ខណៈដែលគេធ្លាប់ឈ្នះពាន MVP ក្នុងលីគ និង MVP ក្នុងពាន Toyota Mekong Championship 2017 ដែលកាលនោះជួយ Lanexang United ទៅដល់វគ្គផ្តាច់ព្រ័ត្រផងដែរ ។

    នេះគឺជាដំណឹងល្អមួយសម្រាប់អ្នកគាំទ្រប្រទេសឡាវ ស្របពេលដែលពានរង្វាន់ AFF Suzuki Cup 2018 នឹងចូលមកដល់នៅខែវិច្ឆិកា ខាងមុខនេះហើយ ដែលឡាវស្ថិតក្នុងពូល A រួមជាមួយ វៀតណាម មីយ៉ាន់ម៉ា ម៉ាឡេស៊ី និង កម្ពុជា ៕

    ភ្ជាប់ទំនាក់ទំនងជាមួយ CTS SPORT