Rakitic សមាជិកក្រុមជម្រើសជាតិក្រូអាត ថា Lionel Messi ជាកីឡាករល្អបំផុតលើលោក ប៉ុន្តែរូបគេជឿជាក់ថាគ្មានអ្វីដែលអាចលាក់បាំងចំពោះទម្រង់លេងរបស់កីឡាករអាហ្សង់ទីននេះទេ។
ក្រូអាតត្រូវប៉ះអាហ្សង់ទីននៅយប់ម៉ោង១រំលងអាធ្រាត្រនេះ ដែលជាប្រកួតទី២របស់ពួកគេ។ ប្រសិនបើក្រូអាតឈ្នះការប្រកួតនេះទៀត នោះពួកគេនឹងបានឡើងទៅវគ្គបន្ដដោយស្វ័យប្រវត្តិហើយ ខណៈដែលអាហ្សង់ទីនវិញ ប្រសិនបើភ្លាត់ចាញ់នោះការឡើងវគ្គ១៦ក្រុមរបស់គេ ក៏ពិបាកដែរ។
មុនការប្រកួតនេះចូលមកដល់ Rakitic ដែលលេងជាមួយ Messi នៅក្លឹប FC Barcelona បានបញ្ជាក់ថា៖ “គ្មានរឿងអីដែលអ្នកមិនដឹងពី Messi ទេ។ យើងកំពុងរស់នៅសម័យកាល Youtube ហើយគ្រប់យ៉ាងគឺមាននៅទីនោះ រួមទាំង Messi ផងដែរ។ វាពិតជាពិបាកក្នុងការផ្ដល់រឿងសម្ងាត់ខ្លះដល់គ្រូបង្វឹករបស់ខ្ញុំ។ គាត់ជាកីឡាករល្អបំផុតលើលោក ហើយសឹងតែគ្មានផ្លូវបិទគាត់ទៅហើយ”។
ចំពោះគ្រូបង្វឹករបស់ក្រូអាត លោក Zlatko Dalic បាននិយាយចំពោះការប្រកួតយប់នេះដែរថា ការប៉ះអាហ្សង់ទីនជាប្រកួតងាយស្រួលសម្រាប់ក្រុមលោក។ លេងជាមួយក្រុមខ្លាំង ក្រូអាតកាន់តែលេងបានល្អជាងធម្មតាទៅទៀត៕ប្រភព៖ DailyMail
