លោក Geoff Hurst វីរបុរសអង់គ្លេស បាននិយាយថាក្រុម Manchester United អាចនឹងដើរតាមគន្លងរបស់ក្រុម Liverpool ដោយមិនអាចឈ្នះពានសោះរយៈពេល២៩ឆ្នាំ។
ក្រុម Man Utd តាំងពីលោក Sir Alex ចាកចេញទៅ ហាក់ធ្លាក់ទម្រង់លេងខ្លាំងមែនទែន។ ពួកគេមិនអាចមានសមត្ថភាពក្នុងការប្រជែងពានរង្វាន់ឡើយ បើទោះជាចំណាយប្រាក់ច្រើនក្នុងការទិញដូរកីឡាករយ៉ាងណាក៏ដោយ។ ដោយឡែកការផ្លាស់ប្ដូរគ្រូបង្វឹកច្រើននាក់កន្លងមក ក៏មិនបានជួយក្រុមឱ្យបានល្អឡើងវិញដែរ។
កត្តានេះហើយទើបលោក Geoff Hurst កីឡាករអង់គ្លេសស៊ុតបាន៣គ្រាប់តែម្នាក់គត់ក្នុងវគ្គផ្ដាច់ព្រ័ត្រ World Cup 1966 បាននិយាយថាក្រុមបិសាចក្រហម អាចនឹងដើរតាមគន្លងរបស់ Liverpool ។ បើទោះជាពួកគេខំប្រឹងប្រែងទិញកីឡាករថ្មីចូលយ៉ាងណាក៏ដោយ ក៏អាចនឹងមិនជោគជ័យដែរ។ នេះអាចជារឿងច្រំដែលដូច Liverpool ដែលចំណាយពេល២៩ឆ្នាំមិនអាចឈ្នះពានលីគអង់គ្លេសបាន៕ប្រភព៖ Dailymail
