ខ្សែប្រយុទ្ធ Lionel Messi បានបញ្ជាក់ថាក្រុម Barcelona នឹងប្រយុទ្ធដើម្បីឈ្នះពានទាំងអស់ម្ដងទៀតឆ្នាំនេះ ក្រោយពីធ្វើមិនបានសម្រេចកាលពីឆ្នាំមុន។
Messi បានដាក់គោលដៅឈ្នះពានទាំងបី La Liga , Copa del Rey និង UEFA Champions League ឱ្យក្រុម Barcelona សម្រាប់រដូវកាលនេះ។ ខណៈដែលរដូវកាលមុន រូបគេក៏និយាយពាក្យនេះដែរ ប៉ុន្តែជួយក្រុម ឈ្នះត្រឹម La Liga ១ ដោយឡែក Copa ដល់វគ្គផ្ដាច់ព្រ័ត្រ និង Champions League ដល់វគ្គ៤ក្រុមចុងក្រោយ។
កីឡាករអាហ្សង់ទីនដែលទើបឈឺចាប់នៅ Copa America ហើយត្រូវសហព័ន្ធបាល់ទាត់អាមេរិកខាងត្បូងពិន័យមិនឱ្យលេង៣ខែនៅជម្រើសជាតិផងនោះ បាននិយាយថា៖ “ខ្ញុំនឹងនិយាយដូចឆ្នាំមុន។ ទាំងអស់គ្នា យើងនឹងប្រយុទ្ធដើម្បីឈ្នះពានរង្វាន់ទាំងអស់។ យើងមានលីគកម្រិតខ្ពស់។ ៨ក្នុងរយៈពេល១១ឆ្នាំ គឺជាពេលវេលាល្អសម្រាប់ក្លឹប។ យើងនឹងមើលឃើញវាថាពិបាកយ៉ាងណាក្នុងការឈ្នះវាម្ដងទៀត”៕ប្រភព៖ Marca
