ត្បិតមិនទាន់ប្រកាសជាផ្លូវការ ប៉ុន្តែតាមរយៈការលើកឡើងរបស់ប្រធានក្លឹប Lille លោក Lopez បានប្រាប់ឥតលាក់លៀមជុំវិញតម្លៃផ្ទេរចេញនិងលក្ខខណ្ឌរបស់ក្លឹបថ្មី នោះគឺ Arsenal ដែលអាចអន្ទងយក Nicolas Pepe បានដោយជោគជ័យ។
ទោះបីមានការប្រជែងជាមួយក្លឹបយក្សអ៊ីតាលី Napoli ប៉ុន្តែទីបញ្ចប់កាំភ្លើងធំនៅតែជាអ្នកឈ្នះក្នុងការនាំយកជើងស៊ុតលំដាប់ទីពីរកាលពីរដូវកាលចាស់នៅ Ligue 1 រូបនេះ។ ប្រធានក្លឹបលោក Lopez បានប្រាប់ RMC Sport៖ “Pepe គេជាអ្នកសម្រេចចិត្ត ហើយខ្ញុំគិតថាដំណឹងផ្លូវការនឹងប្រកាសក្នុងរយៈពេល ២៤ ម៉ោងបន្ទាប់នេះ”។
លោកបន្ត៖ “នោះគឺមានតម្លៃ ៨០ លានអឺរ៉ូ ដោយ Pepe មានជម្រើសពីរធំៗក្នុងដៃរវាង Napoli និង Arsenal ហើយខ្ញុំមិនកុហកអ្នកទេ ដោយកិច្ចព្រមព្រៀងរវាង Napoli កៀកនឹងបញ្ចប់ទៅហើយ ប៉ុន្តែសំណើរបស់ Arsenal មើលទៅមានភាពងាយស្រួលជាង ទាំងផ្នែកហិរញ្ញវត្ថុនិងការរៀបចំផែនការណ៍”។
បញ្ជាក់ថា Pep នឹងក្លាយជាកីឡាករចំណូលថ្មីទី ៤ របស់ Arsenal បន្ទាប់ពីការចុះហត្ថលេខានាំចូល Gabriel Martielli, Dani Ceballos និង William Saliba។ ប្រភព៖ Metro