កាលពីពេលកន្លងទៅអ្នកចាត់ការរបស់ក្លឹប Bayern Munich ធ្លាប់បង្ហាញពីការរំពឹងទុកថាក្លឹបរបស់ខ្លួនមានភាគរយខ្ពស់ក្នុងការនាំយក Leroy Sane ចេញពីទឹកដី Etihad ប៉ុន្តែថ្មីៗនេះរឿងរ៉ាវទាំងអស់ក៏ត្រូវបានបញ្ចប់ត្រឹមមាត់របស់នាយកប្រតិបត្តិក្លឹបអាល្លឺម៉ង់លោក Karl-Heinz Rummenigge។
ទាំងនាយកប្រតិបត្តិលោក Rummenigge និងប្រធានក្លឹបលោក Hoeness របស់ Bayern បានចេញមុខសុំទោសដល់សំណាក់ភាគីខាង Man City ជុំវិញការដែលគ្រូបង្វឹកនៃក្លឹបខ្លួនលោក Kovac និយាយលើសលស់រឿងចង់បាន Sane។
លោក Rummenigge បានសរសេរថា៖ “យើងចាំបាច់ត្រូវមានការគោរពដល់កីឡាករដែលនៅសល់កុងត្រាជាមួយក្លឹបដទៃ ដោយវាក៏ជាច្បាប់របស់ FIFA ផងដែរ”។
សាមីខ្លួនលោក Kovac ក៏បានបកស្រាយថា៖ “ខ្ញុំបាននិយាយជាមួយ Pep Guardiola ដើម្បីសុំការលើកលែងទោសហើយ ដោយខ្ញុំដឹងថា Sane នៅជាប់កុងត្រាជាមួយ Man City បែបនេះខ្ញុំចង់ទទួលបានការលើកលែងទោសពីភាគីខាងក្លឹប City ហើយពេលក្រោយខ្ញុំនឹងគិតគូរឲ្យបានលឿនជាងនេះ”។ ប្រភព៖ AS