រឿងរ៉ាវរបស់ Neymar ចង់ចាកចេញពីទ្រនំនៃទឹកដីបារាំង ក៏បង្កការភ្ញាក់ផ្អើលដល់តារាឆ្នើម Cristiano Ronaldo ផងដែរ ដោយនៅកិច្ចសម្ភាសន៍អំឡុងចូលរួមទទួលបានពាន MARCA Legends Award កីឡាករព័រទុយហ្គាល់បានឆ្លើយតបនូវពាក្យប៉ុន្មានម៉ាត់។
CR7 បាននិយាយប្រាប់ Marca បែបនេះថា៖ “ខ្ញុំមិនដឹងច្បាស់នោះទេ [រឿង Neymar] ដោយគាត់ជាកីឡាករល្អម្នាក់ ហើយទំនាក់ទំនងខ្ញុំជាមួយគាត់ក៏ល្អផងដែរ ខណៈមានការវែកញែកជាច្រើនអំពីគាត់ សម្រាប់ការចូលរួមនៅ Madrid, Barca និង Juve”។
លោកបន្ត៖ “វាជាការងាររបស់សារព័ត៌មាន ព្រោះពួកគេត្រូវការលក់ចេញកាសែត ប៉ុន្តែសម្រាប់ខ្ញុំគឺគិតថា Neymar នឹងបន្តនៅប៉ារីស ហើយប្រសិនជាអត់ទេ គាត់ក៏នឹងទៅចូលរួមនៅទីណាដែលធ្វើឲ្យគាត់សប្បាយចិត្ត ដោយខ្ញុំក៏សង្ឃឹមថាគាត់នឹងបញ្ចៀសបញ្ហារបួសបាន ព្រោះគាត់ជួបច្រើនហើយ បែបនេះវាពិតជាគួរឲ្យបារម្ភ”។ ប្រភព៖ Sportskeeda