Mancheseter United នៅតែបន្តដុតដៃដុតជើងយ៉ាងសកម្មក្នុងការចង់នាំយកខ្សែការពារកណ្តាលថ្មីមួយរូបបន្ថែមទៀត នោះគឺ Harry Maguire ត្បិតសព្វថ្ងៃមានកីឡាករ ៤ រូបក្នុងដៃដូចជា Victor Lindelof, Phil Jones, Chris Smalling និង Eric Bailly ហើយក៏ដោយ។
យោងតាមសារព័ត៌មាន Metro បានចុះផ្សាយថាប្រសិនណាបិសាចក្រហមអាចជោគជ័យក្នុងការចុះហត្ថលេខាយក Maguire ចេញពី Leicester នោះអនាគតរបស់ Eric Bailly អាចនឹងត្រូវយ៉ាប់យ៉ឺនកាន់តែខ្លាំងឡើង។
Bailly នឹងជជែកពីអនាគតរបស់ខ្លួនជាមួយក្លឹប ពោលគឺអាចស្នើដល់ការចាកចេញ បន្ទាប់ពីកីឡាករអង់គ្លេស [Maguire] ផ្លាស់ចូលមកដល់។ សព្វថ្ងៃ Lindelof ជាខ្សែការពារកណ្តាលមួយរូបដែលក្លឹបច្រើនប្រើប្រាស់ បែបនេះរំពឹងនឹងចាប់ដៃគូ Maguire នៅជម្រើស ១១ នាក់។
ឈុតទីពីរគឺ Phil Jones និង Chris Smalling ដែលអ្នកទាំងពីរសុទ្ធសឹងទើបចុះហត្ថលេខាកុងត្រាថ្មីជាមួយក្លឹប ខុសពី Bailly សល់កុងត្រាត្រឹមរយៈពេល ១ ឆ្នាំទៀតប៉ុណ្ណោះ។ ប្រភព៖ FoxSportAsia