ក្រុម Atletico Madrid កំពុងទាមទារឱ្យខាង La Liga ដកឈ្មោះ Griezmann ចេញពីការប្រកួតរដូវកាលថ្មី ដោយសារតែកីឡាកររូបនេះផ្លាស់ទៅ Barcelona ទាំងខុសលក្ខខណ្ឌ។
ក្រុម AT Madrid បានប្ដឹងទៅលោក Javier Tebas ប្រធាន La Liga ជុំវិញករណីដែលក្រុម Barcelona ទាក់ទងទិញយក Griezmann មុនទីផ្សារដោះដូរកីឡាករមកដល់។ ការទាក់ទងមុននេះ បានធ្វើឱ្យតម្លៃខ្លួនរបស់គេធ្លាក់ចុះជាខ្លាំង ទៅតាមផែនការដែលក្រុមអ្នកមានបុណ្យរៀបទុក ដើម្បីនាំយកកីឡាករបារាំងទៅលេងនៅ Camp Nou ក្នុងតម្លៃថោកជាងតម្លៃធម្មតា។
ជាក់ស្ដែងតម្លៃផ្ដាច់កុងត្រារបស់ Griezmann គឺ១៨០លានផោន ប៉ុន្តែដោយសារតែមានការទាក់ទងគ្នាមុនទីផ្សារដោះដូរកីឡាករ ទើបរូបគេនៅសល់តម្លៃខ្លួនតែ១០៨លានផោនប៉ុណ្ណោះ។ រឿងនេះហើយ ទើប AT Madrid មិនសុខចិត្ត ហើយប្ដឹងទៅខាង La Liga ឱ្យដកឈ្មោះកីឡាករបារាំងមិនឱ្យលេងនារដូវកាលនេះ។ ប្រសិនបើចង់បញ្ចប់រឿងក្រុម Barcelona ត្រូវផ្ដល់៧២លានផោនទៀតមកក្រុម AT Madrid ជាការស្រេច៕ប្រភព៖ Dailymail
