អ្នកចាត់ការក្លឹប Bayern Munich លោក Niko Kovac បាននិយាយប្រាប់សារព័ត៌មានដោយឥតលាក់បាំងថាតារាឆ្នើម Leroy Sane គឺជាគោលដៅចម្បងដែលក្លឹបរបស់ខ្លួនកំពុងតាមប្រមាញ់ ដែលចង់នាំយកខ្សែប្រយុទ្ធស្លាបរូបនេះមកចូលរួមនៅ Allianz Arena នារដូវកាលក្រោយ។
ក្នុងការបង្ហាញខ្លួន ៣១ ប្រកួតនារដូវកាលចាស់ កីឡាករវ័យ ២៣ ឆ្នាំរកបាន ១០ គ្រាប់និង Assist ១០ លើក ប៉ុន្តែនៅជម្រើស ១១ នាក់ដំបូងហាក់ពិបាកក្នុងការប្រជែងជាមួយ Raheem Sterling និង Bernardo Silva។
ថ្លែងប្រាប់ Sport Bild លោក Kovac និយាយត្រង់ៗថា៖ “អ្នកឃើញស្រាប់ហើយការផ្ទេរចេញនេះមិនជារឿងងាយទេ ប៉ុន្តែខ្ញុំដឹងថាក្លឹបរបស់យើងបានខិតខំខ្លាំងដើម្បីឲ្យវាកើតឡើងទៅបាន ពោលគឺនឹងធ្វើគ្រប់យ៉ាងដើម្បីសម្រេចការផ្ទេរយក Leroy Sane”។
លោកសង្កត់ធ្ងន់៖ “យើងគ្រប់គ្នាដឹងថា Sane ជាកីឡាករក្នុងក្តីស្រមៃរបស់យើង ជាសាធារណៈនរណាក៏ដឹងដែរ”។ ប្រភព៖ Goal