ក្រុម Liverpool កំពុងតឿនដល់សហព័ន្ធបាល់ទាត់អន្តរជាតិ FIFA ដើម្បីផ្ដល់កាលវិភាគផ្លូវការដល់ពួកគេក្នុងការប្រកួតពានរង្វាន់ FIFA Club World Cup នៅចុងឆ្នាំនេះ។
FIFA បានប្រកាសកាលពីខែឧសភាកន្លងទៅថា Liverpool នឹងត្រូវលេងពានរង្វាន់ Club World Cup នៅទឹកដីកាតា ប៉ុន្តែមិនទាន់បានផ្ដល់កាលវិភាគច្បាស់នៅឡើយទេ។ ដោយគ្រាន់តែដឹងថាពួកគេនឹងត្រូវចូលលេងវគ្គពាក់កណ្ដាលផ្ដាច់ព្រ័ត្រតែម្ដង។ ដោយគ្រាន់តែដឹងច្បាស់ថាការប្រកួតនឹងចាប់ផ្ដើមនៅថ្ងៃទី១១ ហើយបញ្ចប់នៅថ្ងៃទី២២ខែធ្នូឆ្នាំ២០១៩ប៉ុណ្ណោះ។
ការមិនច្បាស់កាលវិភាគប្រកួតនេះហើយ នឹងធ្វើឱ្យក្រុម Liverpool ពិបាកក្នុងការរៀបចំកាលវិភាគរបស់ពួកគេដែរ។ ដោយខែធ្នូខាងមុខនោះ ក៏ជាចំពេលពួកគេត្រូវប្រកួតក្នុងពានរង្វាន់ English Premier League ដែរ។ ដោយថ្ងៃទី២១ខែធ្នូ គឺក្រុម Liverpool ប៉ះជាមួយក្រុម West Ham ហើយថ្ងៃទី២៦ ប៉ះក្រុម Leicester City ទៀត៕ប្រភព៖ Dailymail