បន្ទាប់ពីរងភាពរកាំរកូសនូវពាក្យសម្តីមួយចំនួនដែលលោក Zinedine Zidane បានលើកឡើងកាលពីថ្ងៃអាទិត្យ ក៏ធ្វើឲ្យមានមតិមួយចំនួនហាក់បង្ហាញការមិនពេញចិត្តនិងខ្លះទៀតគិតថាវាជារឿងធម្មតា ព្រោះអនាគតរបស់ Bale ត្រូវបានគេព្យាករណ៍ដឹងជាយូរណាស់មកហើយ។
យ៉ាងណាមិញទៅមើល BRFootball ដែលជាទំព័របាល់ទាត់ល្បីឈ្មោះមួយ បានចែកចាយនូវស្ថិតិប្រៀបធៀបរវាង Zidane នាមជាកីឡាករធៀបនឹង Gareth Bale អំឡុងពេលលេងឲ្យក្លឹប Real Madrid។
ក្នុងនោះ ២២៧ ប្រកួតរបស់ Zidane រកបាន ៤៩ គ្រាប់និង Assist ៦៦ លើកឈ្នះពាន ៦ លើក ខណៈជំនាន់ក្រោយ Gareth Bale រកបាន ១០២ គ្រាប់ក្នុង ២៣១ ប្រកួត បង្កើតបាល់ Assist បាន ៦៥ លើក និងឈ្នះពានសរុប ១៤ លើក។
ទៅមើលការបញ្ចេញមតិជាច្រើននៅលើរូបភាពមួយសន្លឹកនោះ បានបង្ហាញការមិនពេញចិត្តដោយជំទាស់ថាវាជាការប្រៀបធៀបមិនសមស្រប ព្រោះគ្រាដែល Zidane លេងឲ្យ Real គឺគាត់លេងនៅតំណែងបម្រើប្រយុទ្ធ ហើយបែរជាយកមកប្រៀបធៀបជាមួយ Bale ដែលលេងតំណែងប្រយុទ្ធទៅវិញ។
ជាងនេះអ្នកខ្លះក៏និយាយដល់សម័យកាលដែល Zidane នៅលេង គឺមិនសមស្របនឹងការប្រៀបធៀបមកទល់សម័យបច្ចុប្បន្នដែល Bale កំពុងឈរជើង ជាមួយតារាឆ្នើមជាច្រើនរូបទៀតនោះទេ។ ប្រភព៖ BRFootball