ក្លឹបសេះបង្កង់ Juventus បានព្រមព្រៀងក្នុងការនាំយកកីឡាករ Adrien Rabiot នៅលក្ខខណ្ឌឥតតម្លៃខ្លួន បន្ទាប់ពីកីឡាករបារាំងបានផុតកុងត្រាជាមួយក្លឹបសេដ្ឋី Paris Saint-Germain។ ការមកដល់របស់ Rabiot ហាក់ធ្វើឲ្យក្លឹបមានក្តីសង្ឃឹមបន្ថែមទៀត សម្រាប់ការពង្រឹងនៅតំបន់បម្រើនារដូវកាលក្រោយ ២០១៩/២០។
ជជែកជាមួយសារព័ត៌មាន Corriere dello Sport កីឡាករ Rabiot បានប្រៀបធៀបកម្រិតនៃការលេងឲ្យក្លឹបអ៊ីតាលីនិងក្លឹបនៅប្រទេសបារាំងយ៉ាងដូច្នោះថា៖ “វារាងលឿនបន្តិចសម្រាប់ការប្រៀបធៀបរវាងបាល់ទាត់អ៊ីតាលីនិងបារាំង”។
លោកសង្កត់ធ្ងន់៖ “ខ្ញុំអាចនិយាយបានថានៅ Juventus គឺវាលំបាកជាងច្រើនធៀបនឹងការនៅបារាំង ពោលគឺការដែលយើងលេងនៅទីនេះគឺមានលក្ខណៈខុសគ្នា ដោយខ្ញុំមក Juventus ជាក្រុមដែលមានប្រវត្តិសាស្រ្តល្អបំផុត តែខ្ញុំក៏មិនដែលនិយាយថា PSG ជាក្លឹបដែលគ្មានប្រវត្តិអស្ចារ្យអ្វីនោះដែរ”។
“ឥឡូវខ្ញុំគឺជាកីឡាករ Juventus ដោយខ្ញុំចាំបាច់ត្រូវគិតពីអនាគតនៅទីនេះ ទាំងដែល PSG នៅតែជា PSG ហើយវាក៏ ជាផ្នែកមួយនៃអតីតកាលរបស់ខ្ញុំផងដែរ”។ ប្រភព៖ Calciomercato