កីឡាករ​ជប៉ុន ​មួយ​ចំនួន​មាន​ក្ដី​កង្វល់ ព្រោះ​គ្រួសារ​ស្ថិត​នៅ​កន្លែង​រញ្ជួយ​ដី

សមាជិក​ក្រុម​ជម្រើស​ជាតិ​ជប៉ុន​មួយ​ចំនួន ​កំពុង​មាន​ក្ដី​បារម្ភ ដោយសារ​តែ​គ្រួសារ​របស់​ពួកគេ​រស់​នៅ​កន្លែង​ដែល​រង​គ្រោះ​រញ្ជួយ​ដី​កាល​ពី​ម្សិលមិញ​នេះ។

ហេតុការណ៍​រញ្ជួយ​ដី​ដ៏​ខ្លាំង​ក្លា​មួយ បាន​កើត​ឡើង​នៅ​ក្នុង​ទីក្រុង Osaka ប្រទេស​ជប៉ុន។ បើ​តាម​ប្រភព​ពី​ជប៉ុន​បាន​បញ្ជាក់​ថា​មនុស្ស​៣​នាក់​បាន​ស្លាប់ ក្នុង​នោះ​មាន​ក្មេង​ម្នាក់ និង​បណ្ដាល​ឲ្យ​មនុស្ស​ជាង ២០០នាក់​ផ្សេង​ទៀត​រង​របួស។ ​ហេតុការណ៍​នេះ ​បាន​ធ្វើ​ឱ្យ​ក្រុម​ជម្រើស​ជាតិ​ជប៉ុន ដែល​កំពុង​តែ​ត្រៀម​ខ្លួន​លេង World Cup ​នៅ​ប្រទេស​រុស្ស៊ី ​មាន​ក្ដី​បារម្ភ ​និង​បាន​ផ្ញើ​សារ​រំលែក​ទុក្ខ​ដល់​ជន​រងគ្រោះ​ផង​​ដែរ។

Makoto Hasebe ​ប្រធាន​ក្រុម​ជម្រើស​ជាតិ​ជប៉ុន​បាន​និយាយ​ថា​៖ “កីឡាករ​យើង​មួយ​ចំនួន​ដែល​មាន​គ្រួសារ​រស់​នៅ​កន្លែង​កើតហេតុ​នោះ។ ពួកគេ​កំពុង​មាន​ក្ដី​បារម្ភ​ចំពោះ​គ្រួសារ ប៉ុន្តែ​សមាជិក​ក្រុម​ទាំង​មូល​បាន​លើក​ទឹក​ចិត្ត​គាត់ ​ហើយ​យើង​រំពឹង​ថា​មិន​មាន​អ្វី​ប៉ះ​ពាល់​ខ្លាំង​នោះ​ទេ។ ក្នុង​នាម​ខ្ញុំ​តំណាង​ក្រុម​ទាំង​មូល សូម​ចូល​រួម​រំលែក​ទុក្ខ​ដល់​គ្រួសារ​ដែល​រង​គ្រោះ​ផង”។

នៅវេលា​ម៉ោង​៧​ល្ងាច​នេះ ​ក្រុម​ជម្រើស​ជាតិ​ជប៉ុន ត្រូវ​ប្រកួត​បើក​ឆាក​ដំបូង​របស់​ខ្លួន​ហើយ ដោយ​ប៉ះ​ជាមួយ​ក្រុម​ខ្លាំង​កូឡុំប៊ី។ ជប៉ុន ​ធ្វើ​មិន​សូវ​បាន​ល្អ​ទេ ​ក្នុង​ការ​ប្រកួត​៥​ដង​កន្លង​មក ពោល​គឺ​ចាញ់​៣ ស្មើ​១ ​និង​ឈ្នះ​១។ ​ប្រកួត​ចុង​ក្រោយ​ឈ្នះ​ក្រុម​ប៉ារ៉ាហ្គាយ ​ក្នុង​លទ្ធផល ៤-២៕ប្រភព៖ Reuters

 

ភ្ជាប់ទំនាក់ទំនងជាមួយ CTS SPORT