Takefusa Kubo ដែលគេនិយមហៅ Messi ជប៉ុន បាននិយាយថាខ្លួនមិនចង់ឱ្យគេចាប់អារម្មណ៍ខ្លាំងដូច្នេះទេ សម្រាប់ការប្រកួតដំបូងរបស់ខ្លួនឱ្យក្រុម Real Madrid ។
កីឡាករជប៉ុនវ័យ១៨ឆ្នាំបានបង្ហាញខ្លួនជាផ្លូវការហើយឱ្យក្រុម Real Madrid ឈុតធំតែម្ដង ក្នុងការប្រកួតទល់ក្រុម Bayern Munich ។ ត្បិតតែមិនអាចជួយក្រុមទទួលបានជ័យជម្នះមែន ប៉ុន្តែបុរសមាឌល្អិតនេះត្រូវបានគេចាត់ទុកថាមានទម្រង់លេងល្អ ទាំងវ័យក្មេងតែម្ដង។
ជាមួយការចាប់អារម្មណ៍ខ្លាំងនេះ Kubo បែរជាដាក់ខ្លួនថាមិនចង់ឱ្យគេចាប់អារម្មណ៍ខ្លួន សរសើរខ្លួនច្រើនពេកនោះទេ។ ដោយបច្ចុប្បន្ននេះ រូបគេគ្រាន់តែចង់ព្យាយាមជួយក្រុមតាមសមត្ថភាពដែលមានប៉ុណ្ណោះ មិនចង់បានល្បីអ្វីឡើយ។ ជាក់ស្ដែងការប្រកួតមិត្តភាពដំបូងដែលបរាជ័យ ក៏ខ្លួនមិនសប្បាយចិត្តប៉ុន្មានដែរ។
Kubo ជាកីឡាករជប៉ុនដំបូងគេបានបង្ហាញខ្លួនឱ្យក្រុម Real Madrid ។ រូបគេត្រូវបានក្រុមដែលដឹកនាំដោយ Zidane ទិញយកក្នុងតម្លៃខ្លួនជាង២លានដុល្លារ ហើយសាមីខ្លួនទទួលបានតម្លៃពលកម្មជាង១លានដុល្លារផងដែរក្នុង១រដូវកាល៕ប្រភព៖ Marca