Patrice Evra៖ បើ Ronaldo ​ហៅ​ទៅ​លេង​ផ្ទះ ​កុំ​ទៅ​ឱ្យ​សោះ ​ព្រោះ​គាត់​ជា​មនុស្ស​យន្ដ​ទេ

Patrice Evra ​បាន​និយាយ​ថា​ខ្លួន​ធ្លាប់​ទៅ​ផ្ទះ​របស់ Cristiano Ronaldo ​ប៉ុន្តែ​មិន​មាន​អ្វី​សប្បាយ​នោះ​ទេ ព្រោះ​ផ្ទះ​របស់​គេ​មាន​តែ​កន្លែង​ហ្វឹកហាត់ ​ហាត់​គ្រប់​ពេល ​ហាត់​ដូចជា​មនុស្ស​យន្ដ​ទៅ​ហើយ។

Evra ​ជា​អតីត​មិត្ត​រួម​ក្រុម​របស់ Ronaldo ​អំឡុង​ពេល​លេង​នៅ​ក្លឹប Manchester United ​ជាមួយ​គ្នា។ ខ្សែ​ការពារ​ឆ្វេង​រូប​នេះ ​បង្ហើប​ថា​ខ្សែ​ប្រយុទ្ធ​របស់​ព័រទុយហ្គាល់ ​មាន​ការ​ខំ​ប្រឹងប្រែង​ខ្លាំង​ណាស់ ​រូបគេ​មិន​ដែល​យក​ពេល​ទំនេរ​អត់​ប្រយោជន៍​ឡើយ ពោល​គឺ​តែងតែ​ហ្វឹកហាត់​ជា​និច្ច។ ចំណែក​ឯ​ក្នុង​ផ្ទះ​វិញ ​កន្លែង​ណា​ក៏​ជា​កន្លែង​មាន​ឧបករណ៍​ហាត់ប្រាណ​ដែរ។

“ខ្ញុំ​សូម​ផ្ដល់​ដំបូន្មាន​ដល់​អ្នក​រាល់​គ្នា ពេល​ដែល Cristiano ​អញ្ជើញ​អ្នក​ទៅ​ផ្ទះ​របស់​គាត់ ​សម្រាប់​ញ៉ាំ​អាហារ​ពេល​ល្ងាច​នោះ ​សូម​និយាយ​ថា ទេ ទៅ។ គ្មាន​អ្វី​សប្បាយ​នោះ​ទេ ​ផ្ទះ​គាត់​មាន​តែ​កន្លែង​ហ្វឹកហាត់ ​ហើយ​អាហារ​ពេល​ល្ងាច​វិញ ​មាន​តែ​សាឡាត ​និង​សាច់​មាន់ ​ហើយ​មាន​តែ​ទឹក​សុទ្ធ​ប៉ុណ្ណោះ។ ​គ្មាន​ទេ ស្រា ​សម្រាប់​អាហារ​ពេល​ល្ងាច”។ សម្ដី​របស់ Evra ។

បុរស​វ័យ​៣៧​ឆ្នាំ​បាន​បញ្ជាក់​បន្ថែម​ទៀត​ថា ​Ronaldo ​ជា​កីឡាករ​ខំ​ប្រឹងប្រែង​ណាស់ ដូច្នេះ​ហើយ​បាន​ជា​រូបគេ​ជោគជ័យ​រហូត​ដល់​បច្ចុប្បន្ន​នេះ។ រូបរាង​របស់​គេ ពិត​ជា​សក្ដិសម​សម្រាប់​ធ្វើ​ជា​កីឡាករ​កំពូល​សម្រាប់​ប៉ុន្មាន​ឆ្នាំ​ខាង​មុខ​ទៀត ៕ប្រភព៖ DailyMail

 

ភ្ជាប់ទំនាក់ទំនងជាមួយ CTS SPORT