ក្លឹប PSG នឹងពិន័យខ្សែប្រយុទ្ធ Neymar ៣៤០ ០០០ផោន (ជាង៤០ម៉ឺនដុល្លារ) ចំពោះការមិនព្រមមកហាត់ជាមួយក្រុមតាមការកោះហៅរបស់ក្លឹប។
កាលពីម្សិលមិញនេះ ក្រុម PSG បានកោះហៅកីឡាករមកប្រមូលផ្ដុំហ្វឹកហាត់វិញហើយ ប៉ុន្តែគេមិនបានឃើញវត្តមានរបស់កីឡាករប្រេស៊ីលឡើយ។ ក្លឹបបានប្រកាសជាសាធារណៈថា Neymar មិនមកហាត់តាមការកោះហៅទេ ហើយពួកគេក៏នឹងមានវិធានការចំពោះកាយវិការមិនសមរម្យរបស់កីឡាករម្នាក់នេះដែរ។ ការមិនព្រមមកបារាំងវិញនេះ គឺត្រូវបានគេដឹងថាសាមីខ្លួនចង់ប្រកាសឱ្យដឹងគ្រប់គ្នាពីរឿងដែលចង់ចេញពី PSG ឱ្យបាននារដូវក្ដៅនេះ។
អ្វីដែលក្លឹបអ្នកមានបារាំងនឹងធ្វើទៅលើកីឡាករឆ្នើមខាងលើ គឺពិន័យរូបគេជាប្រាក់ដល់ទៅជាង៤០ម៉ឺនដុល្លារឯណោះ។ ហើយការទទួលប្រាក់ Bonus ដទៃទៀត រូបគេក៏អាចនឹងមិនទទួលបានដូចកីឡាករដទៃទៀតដែរ៕ប្រភព៖ dailymail
