លោកCarlo Ancelotti អ្នកចាត់ការនៅក្លឹប Napoli បាននិយាយដោយត្រង់ ថាខ្លួនពិតជាមានក្តីសង្ឃឹមចង់ឃើញវត្តមានរបស់ James Rodriguez មកចូលរួមនៅទឹកដី Stadio San Paolo នារដូវកាលក្រោយ ២០១៩/២០។
តារាឆ្នើមសញ្ជាតិកូឡុំប៊ីកំពុងមានអនាគតមិនប្រាកដប្រជា បន្ទាប់ពីចប់កុងត្រាខ្ចីជើងជាមួយក្លឹប Bayern Munich ដែលរួមរស់អស់រយៈពេល ២ ឆ្នាំក្រោមឈ្មោះរបស់អាណាព្យាបាល Real Madrid។ លុះត្រលប់មកទឹកដីអេស្ប៉ាញវិញ កីឡាករវ័យ ២៧ ឆ្នាំហាក់គ្មានតំណែងលេង ដែលធ្វើឲ្យមានភាពច្រួលច្របល់និងកំពុងពិចារណាក្នុងការផ្លាស់ទៅចូលរួមនៅទ្រនំថ្មីណាមួយ។
ជជែកជុំវិញរឿងរ៉ាវរបស់ James លោក Ancelotti ក៏និយាយដោយត្រង់ថា៖ “ខ្ញុំមិនដឹងថាគាត់នឹងមកឬអត់ទេ តែខ្ញុំសង្ឃឹមថាវាអាចនឹងទៅរួច ដោយខ្ញុំស្គាល់ James ច្បាស់ គេអាចលេងនៅបម្រើគ្រប់តំណែងទាំងអស់ ដោយខ្ញុំក៏ធ្លាប់ប្រើគាត់នៅស្លាបឆ្វេងជាកីឡាករលេខ ១០ ឬស្លាបស្តាំផងដែរ”។
លោកបន្តថា៖ “រឿងតំណែងរបស់គាត់លើទីលានមិនជាបញ្ហាទេ ព្រោះគាត់អាចបត់បែនបាន ហើយអាចលេងនៅតំណែងច្រើន”។ ក្លឹប Napoli កំពុងមានរបាយការណ៍ថាចង់ខ្ចីជើង ត្បិតអី Madrid មានអារម្មណ៍ចង់លក់ដាច់នូវតម្លៃខ្លួន ៤២ លានអឺរ៉ូ។ ប្រភព៖ FoxSportAsia