ក្រុម Arsenal ទិញបានកីឡាករម្នាក់ទៀតហើយ គឺ William Saliba ខ្សែការពារវ័យ១៨ឆ្នាំពីក្រុម Saint-Etienne ក្នុងតម្លៃខ្លួន២៦លានផោន។
ទិញបានពេលនេះមែន ប៉ុន្តែ Saliba នឹងត្រូវក្រុម Saint-Etienne ខ្ចីជើង១រដូវកាលទៀតសិន ទើបផ្លាស់មកលេងនៅ Arsenal ។ កីឡាករវ័យក្មេងនេះទើបបានចូលលេងក្រុមធំនៅចុងឆ្នាំមុនប៉ុណ្ណោះ ដោយបង្ហាញខ្លួនទើបបាន១៦លើកទេ។ ដោយសារតែលេងល្អ ទើបបានជាក្រុមកាំភ្លើងធំទិញយកពេលនេះ ដោយរំពឹងថា១ឆ្នាំទៀតរូបគេនឹងអាចដើរតួសំខាន់នៅតំបន់ការពារមិនខាន។
ក្រុមរបស់លោក Emery នៅចង់បានកីឡាករម្នាក់ទៀត ជាខ្សែប្រយុទ្ធ គឺ Wilfried Zaha របស់ក្រុម Crystal Palace ។ បច្ចុប្បន្នពួកគេមាន៤០លានផោនដើម្បីទិញយកកីឡាករនេះ ប៉ុន្តែខាងក្លឹបដើមរបស់គេទាមទារដល់ទៅ៧០លានផោនឯណោះទើបព្រមលក់ឱ្យ៕ប្រភព៖ Dailymail
