ភ្នាក់ងារលោក Mino Raiola បានបញ្ជាក់ថាប្រធានក្រុមរបស់ Ajax គឺ Matthijs de Ligt បានព្រមព្រៀងលក្ខណៈបុគ្គលក្នុងការផ្លាស់ទៅចូលរួមជាមួយក្លឹប Juventus ហើយ។
យុវជនសញ្ជាតិហូឡង់រូបនេះកំពុងល្ហិចល្ហៀងខ្លាំងនៅលើទីផ្សារដោះដូរថាមានក្លឹបកំពូល ៤ តួយ៉ាងដូចជា Man Utd, Paris Saint-Germain និង Barcelona ក៏ដូចជា Juventus តាមដណ្តើមយករូបគេចេញពីក្លឹប Ajax។
តាមការបញ្ជាក់ប្រាប់សារព័ត៌មាន De Telegraaf សម្តីរបស់ភ្នាក់ងារលោក Raiola បានបង្កការភ្ញាក់ផ្អើលជាខ្លាំង ដោយលោកប្រាប់ថា៖ “Matthijs de Ligt ព្រមព្រៀងលក្ខណៈបុគ្គលទៅចូលរួមនៅ Juventus ហើយ ដោយយើងរង់ចាំតែ Juve ចរចាកិច្ចព្រមព្រៀងជាមួយក្លឹប Ajax តែប៉ុណ្ណោះ ដោយកីឡាករសព្វថ្ងៃមានតែសង្ឃឹមរង់ចាំភាគីសងខាងធ្វើកិច្ចព្រមព្រៀងបានជោគជ័យឲ្យឆាប់រហ័សប៉ុណ្ណឹងឯង”។
តាមរបាយការណ៍ពី Sky Sport Italia កន្លងទៅបានចុះផ្សាយថាក្លឹប Juventus បានដាក់សំណើ ៤៩,៣ លានផោន បូកថ្លៃឧបត្ថម្ភបន្ថែម ៩ ឡានផោនសម្រាប់ De Ligt ប៉ុន្តែមិនទាន់ត្រូវនឹងតម្រូវការចង់បានរបស់ Ajax ដែលមានដល់ទៅ ៦៧,៣ លានផោនឯណោះ។ ប្រភព: SportsMole
