វីរបុរសជើងចាស់ Edgar Davids បានទម្លាយនូវការយល់ឃើញមួយចំនួនថាតារាឆ្នើម Cristiano Ronaldo និងក្លឹបយក្ស Juventus អាចមានឱកាសក្លាយជាក្លឹបល្អដាច់គេក្នុងលោកនាពេលបច្ចុប្បន្ន ប្រសិនណាអាចឈ្នះ Champions League នារដូវកាលក្រោយ។
រយៈពេលប៉ុន្មានឆ្នាំមកនេះសេះបង្កង់ជោគជ័យត្រឹមពានក្នុងស្រុក ប៉ុន្តែពាននៅតំបន់អឺរ៉ុបគឺបានត្រឹមប្រផុតប្រផើយ គ្មានឱកាសឆក់យកជើងឯកនឹងគេនោះឡើយ។ មានការចោទសួរតើ Ronaldo និងមិត្តរួមក្រុមជាជំនាន់កីឡាករល្អបំផុតនៅ Turin ដែរឬទេ? Davids បានឆ្លើយកាត់៖ “តើ Ronaldo បានឡើងដល់វគ្គផ្តាច់ព្រ័ត្រ Champions League ហើយឬនៅ? ពិតណាស់គឺអត់ទេ តែខ្ញុំគិតថាឆ្នាំក្រោយពួកគេអាចធ្វើបាន”។
លោកសង្កត់ធ្ងន់៖ “ប្រសិនអ្នកចង់ល្អបំផុតដាច់គេ ចាំបាច់ត្រូវក្តោបក្តាប់យកក្តីស្រមៃនោះឲ្យបានសិន”។ បញ្ជាក់ថាកាលពីរដូវកាល ២០១៨/១៩ សេះបង្កង់បានបាត់បង់ឱកាសឡើងទៅកាន់វគ្គពាក់កណ្តាលផ្តាច់ព្រ័ត្រ បន្ទាប់ពីបរាជ៏យក្រោមថ្វីជើង Ajax នៅលទ្ធផល ៣-២។
នារដូវកាលបន្ទាប់នឹងជាក្តីសង្ឃឹមថ្មី ដោយមានការសហការរវាងអ្នកចាត់ការថ្មីលោក Maurizio Sarri ដែលត្រៀមខ្លួនរួចរាល់ក្នុងការចូលរួមតតាំងរដូវកាលថ្មីជាមួយ Juventus ក្នុងគោលដៅធ្វើឲ្យបាននូវពាក្យសន្យាថានឹងជួយឲ្យ Ronaldo អាចរកបានលើសពី ៣០ គ្រាប់ក្នុងលីគនាឆ្នាំក្រោយនេះ។ ប្រភព៖ FoxSportAsia