អតីតជើងចាស់នៅ Barcelona គឺតារាឆ្នើម Dani Alves បានប្រែក្លាយជាកីឡាករដំបូងបង្អស់ក្នុងលោកដែលបានឈ្នះពានរង្វាន់ចំនួន ៤០ រាប់តាំងពាន Copa America ២០១៩ លើកចុងក្រោយបង្អស់នេះ។
បុរសវ័យ ៣៦ ឆ្នាំលេងនៅតំណែងខ្សែការពារស្តាំ និងជាអតីតកីឡាករធ្លាប់លេងនៅ Barcelona, Juventus និង PSG លោកក៏បានឈ្នះនាមជាកីឡាករបង្ហាញទម្រង់លេងល្អបំផុតប្រចាំព្រឹត្តិការណ៍ Copa ឆ្នាំ ២០១៩ ផងដែរ។
៤០ ពានរបស់ Alves មាននៅជម្រើសជាតិចំនួន ៤ លើក និងនៅក្លឹប ៣៦ លើក បែងចែកជា ៤ ក្លឹបមាន Sevilla, Barcelona, Juventus និង PSG ដោយនៅ Barcelona ទទួលបានច្រើនជាងគេក្នុងអាជីពរបស់លោកផ្ទាល់។ ធៀបនឹង Lionel Messi គឺបុរសសញ្ជាតិអាហ្សង់ទីនរូបនេះធ្វើបានត្រឹម ៣៥ លើកតែប៉ុណ្ណោះ។
បញ្ជាក់ថាសព្វថ្ងៃ Alves កំពុងទំនេរជើង នាមជាកីឡាករឥតតម្លៃខ្លួនលើទីផ្សារដោះដូរ ក្រោយពីផុតកុងត្រាជាមួយក្លឹបសេដ្ឋីបារាំង ហើយ Liverpool ជាទ្រនំថ្មីមានភាគរយខ្ពស់បំផុតក្នុងការនាំយកកីឡាករប្រេស៊ីល។ ប្រភព៖ FoxSportAsia