Harry Kane ប្រធានក្រុមជម្រើសជាតិអង់គ្លេសបានបញ្ជាក់ថាខ្លួនពិតជាអន្ទះសាចង់លេងនៅព្រឹត្តិការណ៍ World Cup 2018 នេះខ្លាំងណាស់ ដើម្បី បង្ហាញសមត្ថភាពឱ្យពិភពលោកបានឃើញ។
ក្រុមបាល់ទាត់ជម្រើសជាតិអង់គ្លេស នឹងត្រូវលេងតទល់ជាមួយក្រុមទុយណេស៊ី នាម៉ោង១រំលងអាធ្រាត្រនេះ ក្នុងការប្រកួតដំបូងរបស់ពួកគេនៅ World Cup ប្រទេសរុស្ស៊ី។ Kane ជាកីឡាករសំខាន់របស់អង់គ្លេស ក៏ដូចជាម៉ាស៊ីនរកគ្រាប់បាល់ម្នាក់ផងដែរ។ ការប៉ះជាមួយទុយណេស៊ីនេះ អង់គ្លេសមានទំនុកចិត្តខ្ពស់ថានឹងអាចយកជ័យជម្នះបាន ត្បិតអីពួកគេធ្វើបានល្អតាំងពីក្នុងពូល ក៏ដូចជាប្រកួតមិត្តភាពកន្លងមក។
Kane ខ្សែប្រយុទ្ធមុតស្រួចរបស់អង់គ្លេសបាននិយាយថា៖ “៤ឆ្នាំមុន ខ្ញុំមើល World Cup នៅផ្ទះ ខ្ញុំលេងបានតិចណាស់នៅលីគអង់គ្លេស ក្រោមការដឹកនាំរបស់លោក Tim Sherwood ។ ក្រោយពីលោក Pochettino ចូលមកដឹកនាំក្រុម Spurs ខ្ញុំក៏មានឱកាសលេងច្រើន រហូតដល់ជាប់ជម្រើសជាតិនេះ។ នេះជាឱកាសល្អបំផុតសម្រាប់ខ្ញុំ ដើម្បីបង្ហាញឱ្យពិភពលោកស្គាល់ និងយកជ័យជម្នះឱ្យអង់គ្លេស”។
ក្រុមតោកំណាចអង់គ្លេស រងភាពអាម៉ាស់២ដងមកហើយ នៅ World Cup 2014 និងនៅ Euro 2016 ។ ដូច្នេះហើយ World Cup ឆ្នាំនេះ នឹងជាឱកាសល្អមួយសម្រាប់ក្រុមមួយនេះ ដើម្បីស្ដាមុខមាត់ឡើងវិញ៕ប្រភព៖ DailyMail