Medel ៖ ការ​ប៉ះ​គ្នា​របស់​ខ្ញុំ ​និង Messi ​មិន​គួរ​បាន​កាត​ក្រហម​នោះ​ទេ ​សូម្បី​តែ​លឿង​

Gary Medel កីឡាករ​ឈីលី ដែល​បាន​កាត​ក្រហម​ជាមួយ Messi ​នោះ ​បាន​បញ្ជាក់​ថា​ពួកគេ​ទាំង​ពីរ​នាក់​មិន​សម​បាន​កាត​ក្រហម​ឡើយ ​ទោះ​លឿង​ក៏​មិន​សម​ដែរ។

ក្នុង​ការ​ប្រកួត​ដណ្ដើម​យក​លេខ​៣ ​ពាន​រង្វាន់ Copa America ​ក្រុម​អាហ្សង់ទីន ​បាន​យក​ឈ្នះ​លើ​ក្រុម​ឈីលី ​២-១។ ក្នុង​ការ​ប្រកួត​នោះ ​មាន​កីឡាករ​២​នាក់​បាន​កាត​ក្រហម គឺ Lionel Messi ​ប្រធាន​ក្រុម​អាហ្សង់ទីន ​និង​កីឡាករ Medel ​របស់​ឈីលី។ ​ពួកគេ​បាន​កាត​ក្រហម ​ក្រោយ​ពី​មាន​ការ​ប៉ះ​ទង្គិច​គ្នា​តិច​តួច​អំឡុង​ការ​ប្រកួត​នាទី​៣៧។

ការ​បាន​កាត​ក្រហម​នេះ ​បាន​ធ្វើ​ឱ្យ Medel ​ហួស​ចិត្ត ​និង​និយាយ​ក្រោយ​ចប់​ការ​ប្រកួត​នោះ​ថា​៖ “ខ្ញុំ​យល់​ស្រប​ដូច Messi ​ដែរ។ ខ្ញុំ​មិន​គិត​ថា​យើង​បាន​កាត​ឡើយ សូម្បី​តែ​កាត​លឿង ចំពោះ​ការ​ប៉ះ​ទង្គិច​គ្នា​នេះ។ វា​មិន​មាន​អ្វី​ធ្ងន់ធ្ងរ​ទេ ​អាជ្ញាកណ្ដាល​គួរ​តែ​ព្រមាន​បាន​ហើយ ​មិន​គួរ​ផ្ដល់​ដល់​កាត​ក្រហម​ឡើយ”។

Messi ​បើ​ទោះ​បាន​លេខ​៣​មែន ប៉ុន្តែ​មិន​ព្រម​ឡើង​ទទួល​មេដាយ​ឡើយ។ រូបគេ​បាន​បញ្ជាក់​ថា​អាជ្ញាកណ្ដាល​ការ​ព្រឹត្តិការណ៍​នេះ​លំអៀង​មិន​យុត្តិធម៌។ ដូច្នេះ​ហើយ ទើប​រូបគេ​មិន​ព្រម​ចូល​រួម​ជាមួយ​អំពើ​ពុក​រលួស​ឡើយ៕ប្រភព៖ Dailymail

ភ្ជាប់ទំនាក់ទំនងជាមួយ CTS SPORT