ក្រុមបាល់ទាត់នារីអាមេរិក បានការពារតំណែងជើងឯក Women World Cup របស់ខ្លួនបានសម្រេចហើយ ក្រោយយកឈ្នះលើក្រុមហុល្លង់ក្នុងលទ្ធផល ២-០ នៅវគ្គផ្ដាច់ព្រ័ត្រ។
អាមេរិក ដែលជាក្រុមលេខ១លើលោកផ្នែកបាល់ទាត់នារី មិនធ្វើឱ្យអ្នកគាំទ្រខ្លួនខកចិត្តឡើយ។ ក្នុងការប្រកួតវគ្គផ្ដាច់ព្រ័ត្រ Women World Cup ពួកគេធ្វើបានយ៉ាងល្អ ដែលយកឈ្នះលើក្រុមហុល្លង់បានដល់២-០។ ២គ្រាប់នោះធ្វើសម្រេចដោយ Rapinoe នៅនាទី៦១ ដោយបាល់ប៉េណាល់ទី និង១គ្រាប់ទៀតបានដោយ Lavelle នៅនាទី៦៩។ ហុល្លង់ ហាក់មិនមានអ្វីធ្វើឱ្យអាមេរិក បារម្ភទាល់តែសោះសម្រាប់ការប្រកួតមួយនេះ។
សម្រាប់កីឡាការិនី Rapinoe ប្រធានក្រុមអាមេរិក ក៏បានជាប់ឈ្មោះជាកីឡាការិនីល្អជាងគេក្នុងព្រឹត្តិការណ៍ ក៏ដូចជាស្បែកជើងមាសផងដែរ។ នេះជាលើកទី៤ហើយសម្រាប់អាមេរិក ដែលអាចលើកពានរង្វាន់ Women World Cup បាន៕ប្រភព៖ Dailymail