ខ្សែប្រយុទ្ធ Antoine Griezmann កាន់តែកៀកផ្លាស់ទៅក្រុម Barcelona មែនទែនហើយ ក្រោយពីសាមីខ្លួនព្រមកុងត្រា៥ឆ្នាំជាមួយតម្លៃពលកម្ម១៥លានផោនក្នុងមួយសប្ដាហ៍។
កីឡាករបារាំងនេះ បានប្រកាសចាកចេញពីក្រុម Atletico Madrid តាំងពីចប់រដូវកាលមុនម្ល៉េះ ប៉ុន្តែរហូតមកទល់ពេលនេះរូបគេមិនទាន់សម្រេចទៅលេងនៅក្លឹបណាបន្ដទៀតនៅឡើយទេ។ ក្លឹបដែល Griezmann ចង់លេងបន្ដទៀត គឺក្រុម Barcelona ប៉ុន្តែពួកគេហាក់ពិបាកយក ព្រោះតម្លៃខ្លួនរបស់គេខ្ពស់ ហើយសមាជិកក្រុមមួយចំនួនក៏មិនចង់បានដែរ។
ប្រភពនៅអេស្ប៉ាញបានចុះផ្សាយថាក្រុម AT Madrid នឹងលក់រូបគេចេញក្នុងតម្លៃ១០៧លានផោន ដើម្បីយកប្រាក់នេះទៅទិញកីឡាករថ្មីវ័យក្មេង Joao Felix របស់ក្រុម Benfica វិញ។ ដោយសារតែតម្លៃនេះហើយ ទើបបានជាក្រុម Barcelona មិនទាន់ចុះកុងត្រាយកភ្លាមៗនោះទេ។ តែមួយរយៈនេះមានដំណឹងមកថាសាមីខ្លួនយល់ព្រមកុងត្រា៥ឆ្នាំជាមួយក្រុមអ្នកមានបុណ្យរួចទៅហើយ។ ដូច្នេះ ការទិញផ្ដាច់កុងត្រានឹងកើតមានឡើងឆាប់ៗនេះ៕ប្រភព៖ Dailymail