យោងតាមការបញ្ជាក់ជាផ្លូវការពីក្លឹប Benfica របស់ក្របខ័ណ្ឌកំពូលព័រទុយហ្គាល់បានឲ្យដឹងថាខ្លួនបានទទួលសំណើរលើទំហំសាច់ប្រាក់ដ៏ខ្ពស់មួយដល់ទៅ ១២៦ លានអឺរ៉ូ លើការចង់បានខ្សែប្រយុទ្ធឆ្នើម Joao Felix ពីសំណាក់ក្លឹប Atletico Madrid នៅទឹកដីអេស្ប៉ាញ។
ត្បិតក្លឹបមិនទាន់ប្រកាសពីការសម្រេចចិត្តថាព្រមឬអត់ក្តី តែតាមគណនី Fabrizio Romano នៃសារព័ត៌មាន The Guardian សង្កត់ធ្ងន់ថាកិច្ចព្រមព្រៀងនេះគឺធ្វើទៅបានដោយផ្លូវការហើយ។ តម្លៃ ១២៦ លានអឺរ៉ូ ជាទំហំខ្ពស់ជាងតម្លៃផ្តាច់កុងត្រាដើមដែល Benfica ប្រកាសកន្លងទៅប្រមាណ ៦ លានអឺរ៉ូ។
បញ្ជាក់ថាប្រសិនណា Atletico ជោគជ័យលើការចុះហត្ថលេខាយក ‘Ronaldo ទីពីរ’ ពិតមែន នោះក្លឹបអេស្ប៉ាញនឹងយកឈ្នះលើក្លឹបយក្ស ២ សម្រាប់ការប្រជែងចង់បាននេះ ដោយរួមមាន Manchester City និង Manchester United។ ប្រភព៖ BRFootball