ក្លឹប Valencia បានចុះហត្ថលេខាលើកិច្ចព្រមព្រៀងផ្លូវការក្នុងការនាំយកអ្នកចាំទីដៃទីពីររបស់ Barcelona គឺកីឡាករ Jasper Cillessen មកចូលរួមនារដូវកាលក្រោយ។ ក្រុមប្រជៀវខ្មៅក៏មានកៅអីសម្រាប់លេង Champions League ពោលគឺ Cillessen អាចនឹងតតាំងជាមួយក្លឹបចាស់របស់ខ្លួន។
កីឡាករសញ្ជាតិហូឡង់ចាកចេញពី Ajax មកចូលរួមនៅ Camp Nou ចាប់តាំងពីឆ្នាំ ២០១៦ ដែលលោកមានបំណងចង់ចូលរួមលេងជាប់លាប់ ប៉ុន្តែនៅ Barca បានត្រឹមជាស្រមោលក្រោមថ្វីដៃរបស់ ter Stegen តែប៉ុណ្ណោះ។
Cillessen ក៏បានបង្ហាញគុណភាពនៃការសង្រ្គោះបាល់ល្អគួរសមក្នុងការតតាំងពានរង្វាន់ Copa del Rey ប៉ុន្មានប្រកួតដែលជួយឲ្យក្រុមអាចឡើងទៅកាន់វគ្គផ្តាច់ព្រ័ត្រ តែសោកស្តាយត្រូវបរាជ័យក្រោមថ្វីជើង Valencia នេះផ្ទាល់ នៅលទ្ធផល ២-១។ ប្រភព៖ Marca
