ក្រុមបាល់ទាត់ជម្រើសជាតិកម្ពុជា បានហក់ឡើង ៤លេខ ក្នុងតារាងចំណាត់ថ្នាក់ FIFA World Ranking ខែមិថុនានេះ ពោលគឺពីលេខ ១៧៣ មកលេខ ១៦៩។
ចំណាត់ថ្នាក់ល្អនេះគឺបានមកពីការឈ្នះប៉ាគីស្ថានទាំង២ជើងក្នុងការប្រកួតជម្រុះបាល់ទាត់ពិភពលោក FIFA World Cup កាលពីពេលថ្មីៗនេះ។ ក្រុមគោព្រៃកម្ពុជា ខកខានឪកាសឈ្នះ២ប្រកួតជាប់គ្នា តាំងពីខែតុលាឆ្នាំ២០១៦មកម្ល៉េះ ពោលគឺតាំងពីជម្រុះ Suzuki Cup ជាមួយ ទីម័រ ប្រ៊ុយណេ និងឡាវ។
បើប្រៀបធៀបជាមួយក្រុមផ្សេងទៀតនៅអាស៊ាន កម្ពុជា ឈរលើប្រទេសចំនួន ៣ គឺ ឡាវ (១៨៨), ប្រ៊ុយណេ (១៩៣), ទីម័រខាងកើត (២០០)។ ចំំណែកក្រុមអាស៊ានដែលឈរលើកម្ពុជា រួមមាន វៀតណាម (៩៦), ថៃ (១១៦), ហ្វីលីពីន (១២៦), មីយ៉ាន់ម៉ា (១៣៨), ម៉ាឡេស៊ី (១៥៩), សិង្ហបុរី (១៦២)។
ចំណាត់ថ្នាក់ដែលកម្ពុជាធ្លាប់ធ្វើបានល្អបំផុតគឺត្រឹមលេខ១៣៥ កាលពីឆ្នាំ២០១១ ខណៈកំណត់ត្រាអាក្រក់បំផុតលេខ១៩៨កាលពីឆ្នាំ២០១៤។