តាមការសិក្សាមួយបានបញ្ជាក់ថាតម្លៃខ្លួនរបស់ Neymar បានធ្លាក់ចុះ១០០លានផោន ដោយសារតែបញ្ហារបួសច្រើនពេក និងថ្មីៗនេះមានរឿងអាស្រូវរំលោភនារីភេទទៀត។
តាមស្ថិតិបង្ហាញថា តាំងពីចូលលេងឱ្យក្រុម PSG មក ខ្សែប្រយុទ្ធ Neymar លេងបានតែ៥១,៨% ប៉ុណ្ណោះ ក្នុងចំណោមការប្រកួតសរុប។ ក្រៅពីនោះ គឺសុទ្ធតែជាប់ពិន័យ និងរបួសរហូត។ អមជាមួយបញ្ហារឿងអាស្រូវ ជាមួយអ្នកគាំទ្រ និងនារីម្នាក់កាលពីពេលថ្មីៗនេះទៀត បានធ្វើឱ្យតម្លៃខ្លួនរបស់គេធ្លាក់ចុះយ៉ាងខ្លាំង។
កាលពីឆ្នាំ ២០១៧ រូបគេផ្លាស់ពីក្រុម Barcelona ទៅ PSG មានតម្លៃខ្លួន២២២លានអឺរ៉ូ។ ខណៈដែលបច្ចុប្បន្ននេះតម្លៃខ្លួនបានធ្លាក់១០០លានបាត់ទៅហើយ ពោលគឺនៅត្រឹមប្រមាណ១២០លានអឺរ៉ូប៉ុណ្ណោះ។ សម្រាប់ឆ្នាំនេះទៀតសោត Neymar ក៏ប្រហែលមិនស្ថិតក្នុងបញ្ជីឈ្មោះកីឡាករ៥០នាក់ចុងក្រោយប្រជែងពាន Ballon d’Or ផង៕ប្រភព៖ Marca
