ក្រុមអ្នកគាំទ្រ Chelsea នៅអង់គ្លេស បានចាត់ទុកថ្ងៃនេះ ថាជាថ្ងៃពិបាកចិត្តសម្រាប់ពួកគេ ក្រោយពីក្រុម Chelsea យល់ព្រមលក់ Eden Hazard ឱ្យទៅ Real Madrid ក្នុងតម្លៃ១៣០លានផោន។
ក្រោយពីចរចាគ្នាអស់ពេលជាច្រើនថ្ងៃមកនេះ ក្រុម Chelsea និង Real Madrid បានយល់ព្រមគ្នាក្នុងការផ្ទេរ Hazard ទៅលេងនៅអេស្ប៉ាញហើយ។ ក្នុងការផ្ទេរនេះដែរ គឺមានតម្លៃខ្លួន៨៨លានផោនប្រាក់សុទ្ធឱ្យទៅតោខៀវពេលនេះ ហើយនឹងបន្ថែមប្រាក់រហូតដល់១៣០លានផោនតែម្ដង ប្រសិនបើរូបគេអាចជួយក្រុម Real Madrid ឈ្នះពានរង្វាន់បាន។ ក្រោយពីមានការយល់ស្របគ្នាលើការផ្ទេរនេះហើយ ទើបបានជាធ្វើឱ្យអ្នកគាំទ្រចាត់ទុកថ្ងៃនេះ ជាថ្ងៃពិបាកចិត្តដែលកីឡាករសំណព្វរបស់ខ្លួនត្រូវចាកចេញ។
សម្រាប់សាមីខ្លួន Hazard វិញ មិនមានលក្ខខណ្ឌអ្វីច្រើនទេ ព្រោះថារូបគេមានក្ដីស្រមៃចង់ទៅលេងឱ្យក្រុម Real Madrid ក្រោមការដឹកនាំរបស់លោក Zidane នេះជាយូរមកហើយ។ លេងនៅ Chelsea កីឡាករបែលហ្សិករូបនេះ បង្ហាញខ្លួនបាន៣៥២ប្រកួត រកបាន១១០គ្រាប់ និងបញ្ជូនបាល់ឱ្យមិត្តរួមក្រុមបាន៩២គ្រាប់៕ប្រភព៖ Dailymail