ខ្សែការពារឆ្វេង Sergio Reguilon ត្រូវបានគេរាយការណ៍ថានឹងចាកចេញពីក្លឹប Real Madrid នាទីផ្សារដោះដូររដូវក្តៅខាងមុខនេះ ប៉ុន្តែទ្រនំនៃក្លឹបថ្មីរបស់ខ្លួនអាចព្រមព្រៀងផ្លាស់ទៅបានលើកលែងតែជាក្លឹបមានកៅអីលេងនៅ Champions League រដូវកាលក្រោយ។
នារដូវកាល ២០១៨/១៩ ខ្សែការពារ Reguilon ជាប់ជម្រើស ១១ នាក់ដំបូងបាន ២២ លើករាប់ទាំងប្រកួតនៅ CL ប៉ុន្តែក្រោយពេល Zinedine Zidane ត្រលប់មកដល់ ការបង្ហាញខ្លួនរបស់គេក៏ផ្តើមធ្លាក់អន់ថយ ត្រឹមជាស្រមោលនៅពីក្រោយវត្តមានរបស់ជើងចាស់ Marcelo តែប៉ុណ្ណោះ។
ក្លឹបមួយចំនួនដែលរងចចាមអារ៉ាមថាចង់បានរូបគេរួមមាន Alaves, Leganes និង Borussia Dortmund ស្របពេល Sevilla ដែលទើបចាត់តាំងតំណែងលោក Julen Lopetegui ក៏ចាប់អារម្មណ៍កីឡាករសញ្ជាតិអេស្ប៉ាញរូបនេះផងដែរ។ ប្រភព៖ AllFootball
