យោងតាមសារព័ត៌មាន Sport Bild បានចុះផ្សាយថាអ្នកចាត់ការដែលទើបជួយឲ្យហង្សឈ្នះពាន Champions League លោក Jurgen Klopp បានទទូចសុំឲ្យថ្នាក់លើរបស់ Liverpool គួរលៃលកតាមចុះហត្ថលេខាយកតារាឆ្នើម Matthijs de Ligt មកចូលរួមនៅ Anfield ជាមួយនឹង Virgil van Dijk។
de Ligt ដែលកំពុងរងចចាមអារ៉ាមថាចង់បានខ្លាំងពីសំណាក់ក្លឹប Manchester United និង Barcelona ក៏មិនទាន់ស្វែងរកបានទ្រនំច្បាស់ការណាមួយនៅឡើយ ខណៈដែលកីឡាករវ័យ ១៩ ឆ្នាំរូបនេះ ត្រូវបានលោក Klopp សម្លឹងឃើញជាដៃគូសក្តិសមបំផុតជាមួយ Van Dijk។
អ្នកទាំងពីរក៏កំពុងរួបរួមគ្នានៅជម្រើសជាតិហូឡង់សម្រាប់ការប្រកួតនាពេលខាងមុខនេះផងដែរ ហើយអ្នកចាត់ការក្រុមជម្រើសជាតិលោក Ronald Koeman បានសរសើរមិនដាច់ពីមាត់ថាលោកកំពុងមានគ្រាប់ពេជ្រជាខ្សែការពារកណ្តាលល្អដាច់គេ ២ រូបនៅក្នុងក្រុមរបស់លោក។ ប្រភព៖ Metro
