ទាំងអតីតអ្នកចាត់ការក្លឹបបិសាចក្រហមលោក Louis van Gaal និងអតីតអ្នកចាត់ការក្លឹប Ajax លោក Peter Bosz បានបង្ហាញការយល់ឃើញដូចគ្នាថាខ្សែការពារជំនិត Matthijs de Ligt គួរណាតែបដិសេធសំណើនៃការចង់បានរបស់ក្លឹប Manchester United ហើយស្រវាមកចាប់យកក្លឹប Manchester City ជំនួសវិញ។
De Ligt ដែលរងចចាមអារ៉ាមថាអាចចាកចេញពី Ajax នាទីផ្សារដោះដូររដូវក្តៅខាងមុខ ត្រូវបានលោក Bosz បានប្រាប់ Fox Sports ថា៖ “ខ្ញុំគិតថាគេសក្តិសមជាមួយ Man City ជាង នៅពេលដែល Vincent Kompany គេទៅបាត់ ហើយ Nicolas Otamendi ក៏មិនទាន់ល្អគ្រប់គ្រាន់ផងនោះ បែបនេះខ្ញុំចង់ឃើញគេលេងជាមួយ Aymeric Laporte”។
ចំណែកឯ Van Gaal ក៏ព្រមព្រៀងលើការលើកឡើងនេះ៖ “ខ្ញុំក៏គិតអ៊ីចឹងដែរ មិនថាតែ Barcelona ក៏ដូចគ្នា ប៉ុន្តែគេក៏អាចលេងនៅ Man City បានដែរ ដោយករណីនេះខ្ញុំសុំរើសយកក្រុមរបស់លោក Pep Guardiola ជាជាង Lionel Messi”។
រំឭកថាភាគរយខ្ពស់បំផុតសព្វថ្ងៃ de Ligt ហាក់ជាប់ពាក់ព័ន្ធនឹងការផ្លាស់ទៅចូលរួមនៅ Camp Nou ព្រោះល្ហិចល្ហៀងថាអាចដើរតាមគន្លងចាស់របស់មិត្តរួមទ្រនំ Frenkie de Jong ដែលអ្នកមានបុណ្យចរចាយកបានតាំងពីខែមករាមកម្ល៉េះ។ ប្រភព: Metro
