លោក Unai Emery អ្នកចាត់ការក្រុម Arsenal បានបញ្ជាក់ថាការមិនបានលេងពានរង្វាន់ UEFA Champions League នារដូវកាលក្រោយ នឹងមានឥទ្ធិពលសម្រាប់ការទិញដូរកីឡាករនៅរដូវក្ដៅនេះ។
ក្រុម Arsenal បានបាត់ឱកាសលេងនៅ UCL ហើយ ក្រោយពីចាញ់យប់មិញ។ កត្តាមិនបានលេងនៅពានធំនៅអឺរ៉ុបនេះ អាចនឹងមានផលប៉ះពាល់ដល់ការទិញដូរកីឡាកររបស់កាំភ្លើងធំ ព្រោះកីឡាករល្អៗបច្ចុប្បន្នមានបំណងធំក្នុងការលេងនៅ Champions League នេះ។
អ្នកចាត់ការ Emery ក៏បានមើលឃើញចំណុចនេះដែរ។ លោកបាននិយាយដូច្នេះថា៖ “មានកីឡាករជាច្រើនចង់លេងនៅទីនេះ Arsenal ជាក្លឹបធំមួយ។ ការមិនបានលេងនៅ UCL គឺជារឿងធ្វើឱ្យក្រុមពិបាកចិត្ត មិនដល់គោលដៅ ហើយគម្រោងទិញកីឡាករល្អៗមួយចំនួនក៏អាចប៉ះពាល់ផងដែរ។ ប៉ុន្តែ Arsenal ជាក្រុមធំមួយ យើងរំពឹងថារដូវកាលក្រោយ នឹងអាចស្វែងរកភាពជោគជ័យមកវិញ”៕ប្រភព៖ Dailymail