Chelsea បានបំបាក់ក្រុមកាំភ្លើងធំ Arsenal នៅលទ្ធផល ៤-១ បន្ទាប់ពី Olivier Giroud និង Pedro លេងមួយគ្រាប់ មុនពេល Hazard បំបែក ២ គ្រាប់ម្នាក់ឯង។ ជ័យជម្នះនៃការការពារជើងឯក Europa League រដូវកាល ២០១៨/១៩ ក៏ជាប្រវត្តិសាស្រ្តលើកទី ២ ចារឈ្មោះសម្រាប់ក្លឹបតោខៀវ Chelsea ផងដែរ។
យ៉ាងណាមិញក្រោយបិទការប្រកួត Hazard បានព្រលយពាក្យលាជាមួយសារព័ត៌មាន BT Sport៖ “ខ្ញុំគិតថានេះជាពេលត្រូវលាគ្នាហើយ”។ នេះជាសារឆ្លើយតបទៅនឹងចចាមអារ៉ាមដែល Real Madrid បាននឹងកំពុងដុតដៃដុតជើងបញ្ចប់ការចរចាកិច្ចព្រមព្រៀងជាមួយកីឡាករបែលហ្សិកយ៉ងតក់ក្រហល់។
តាមរយៈអ្នកចាត់ការលោក Maurizio Sarri បានផ្តល់បទសម្ភាសន៍ក្រោយបិទការប្រកួតនេះដូចគ្នា ដោយលោកបង្ហើបថា៖ “អ្នកដឹងហើយថា Hazard គេជាកីឡាករដ៏អស្ចារ្យ តែអ្នកត្រូវចំណាយពេល ២ ទៅ ៣ ខែដើម្បីយល់ពីគេច្បាស់ ពោលគឺគាត់អស្ចារ្យមែនទែន”។
លោកបន្ត៖ “ខ្ញុំដឹង ខ្ញុំបានដឹងហើយថា Hazard ចង់ចាកចេញ តែរាល់ការនិយាយរបស់ខ្ញុំនៅសន្និសីទសារព័ត៌មានទាំងអស់ គឺខ្ញុំចង់គោរពលើការសម្រេចចិត្តរបស់គាត់ តែនេះដល់ពេលដែលខ្ញុំត្រូវនិយាយជាមួយក្លឹបហើយ”។ ប្រភព៖ FoxSportAsia
