ក្រុម Real Madrid ត្រូវចំណាយ១,២លានផោនក្នុង១សប្ដាហ៍ ទើបអាចនាំយកខ្សែប្រយុទ្ធ Neymar មកលេងនៅអេស្ប៉ាញវិញបាន។
កីឡាករប្រេស៊ីលរូបនេះ ផ្លាស់ទៅលេងនៅ PSG កាលពីឆ្នាំ២០១៧កន្លងទៅ ក្នុងតម្លៃខ្លួន១៩៨លានផោន។ លេងនៅទឹកដីបារាំងនេះ Neymar ហាក់មិនសប្បាយឡើយ ព្រោះមិនអាចជួយក្រុមជោគជ័យនៅ UEFA Champions League បាន ហើយក៏មិនឈ្នះពានរង្វាន់កិត្តិយសធំអ្វីដែរ។ កត្តានេះហើយ ទើបបានជារូបគេចង់ចាកចេញនារដូវក្ដៅនេះ។
ក្រុមដែលកំពុងចង់បាន Neymar ជាងគេ គឺក្រុម Real Madrid ។ ពួកគេបានចរចាយកអតីតកីឡាករ Barcelona នេះច្រើនដងមកហើយ ប៉ុន្តែមិនអាចយកបាន ព្រោះក្រុម PSG បានដាក់តម្លៃខ្ពស់ខ្លាំងពេក។ នៅពេលនេះក៏មានដំណឹងមកទៀតថា Neymar ឯណោះ ចង់បានប្រាក់ឈ្នួលខ្ពស់ណាស់ ទើបព្រមផ្លាស់ទៅ Real Madrid ។ ប្រាក់ឈ្នួលដែលរូបគេទាមទារនោះគឺរហូតដល់១,២លានផោនក្នុង១សប្ដាហ៍ឯណោះ៕ប្រភព៖ Dailymail