ក្លឹបបារាំង Paris Saint-Germain បានប្រកាសមុននេះបន្តិចថាខ្លួនបានព្រមព្រៀងជាមួយអ្នកចាត់ការ Thomas Tuchel លើកិច្ចបន្តកុងត្រាថ្មីដល់ថ្ងៃទី ៣០ មិថុនា ឆ្នាំ ២០២១។
អ្នកចាត់ការសញ្ជាតិអាល្លឺម៉ង់បានមកចូលរួមនៅទ្រនំទឹកដីបារាំងកាលពីរដូវក្តៅឆ្នាំទៅ ក្រោយចាកចេញពីក្លឹបចាស់ Borussia Dortmund ដែលបានចាយពេលដឹកនាំអស់រយៈពេល ២ ឆ្នាំ។ នារដូវកាល ២០១៨/១៩ លោកក៏បានដឹកនាំឲ្យ PSG ឈ្នះពានរង្វាន់ Ligue 1 លើកទី ៦ ក្នុងរយៈពេល ៧ ឆ្នាំចុងក្រោយ ប៉ុន្តែខកខាននៅការឆ្លងផុតវគ្គ ១៦ ក្រុមចុងក្រោយ Champions League។
បញ្ជាក់លើគេហទំព័រផ្លូវការរបស់ក្លឹប លោក Tuchel មានប្រសាសន៍ថា៖ “ខ្ញុំពិតជារីករាយនិងមានមោទនភាពជាទីបំផុតសម្រាប់ការបន្តកុងត្រាថ្មីនេះជាមួយក្លឹប Paris Saint-Germain ដោយអរគុណដល់ប្រធាននិងក្លឹបទាំងមូល នូវទំនុកចិត្តមកលើខ្ញុំនិងបុគ្គលិករបស់ខ្ញុំ”។ ប្រភព៖ 90min
